Аламат бериулери къууандырадыла

20-чы ёмюрню аллында окъуна хар таулу юйюрде радио аппаратлары болгъанды, ала адамланы бир ахшы нёгерлери болуп, къууанч, бушуу хапарланы билдирип тургъандыла. Уллу ,Ата журт урушну кезиуюнде да уруш аулакълада жанларын, къанларын аямагъан уланларыбызны юслеринден хапар бергендиле халкъгъа. Технологияланы айный баргъаны бла уа, белгили дикторланы ауазларын эшитгенден сора да, къара-акъ кёргюзтген телевизорлада аланы кёрюрге да онг болгъанды.

Къабарты-Малкъар Республикада ВГТРК-ГТРК «Къабарты-Малкъар» ишин жетишимли бардыргъанлай, эл-элледе къаллай къууанчла болгъанларын, башха-башха ишледе уруннган адамланы жашауларында билдиргенлей турады. Бизге радио-телевиденияны бюгюннгю ишини юсюнден «Къабарты-Малкъар» ГТРК-ны башчысыны орунбасары Сабанчыланы Арипа билдиргенди. Ол бюгюнлюкде радиостанция орналып, бизни республикада ачылгъанлы, токъсан алты жыл болгъанында айтады.

- Сегиз сабийни орта Азиягъа элтип андан къайтаралгъан къарт анам Зубай радиосуз болмай эди. Ол сёлешмей башласа, мынга не болгъанды деп, жарсыгъанлай тура эди. Телевидение къуралгъанлы уа элли алты жыл толгъанды. Ол ишин бир-эки оператор бла, режиссёрла да жетмегенлей, алай башлагъан эди. Кадрлагъа аз болсала да, бек къаты къарагъандыла, ала терен билимлиле болмасала, алмагъандыла.

- Алай радиону, телевиденияны да тарыхына къарагъанда, бизни миллетден белгили, фахмулу инсанлада кёпдюле. Жаланда Атталаны Анатолийни айтып къойсакъ да, аны къыйыны телевиденияда бек уллуду. Битеу кёчгюнчюлюк бла байламлы, белгили бериулени, киноланы да ол жазгъанды. Дагъыда Шаханланы Нафисат, сау-саламат энтта да кёп жылланы жашасын, режиссёрланы эм билимлилеринденди.

  Жаболаны Людмила да аллай уста режиссёрланы санындады. Композитор Жеттеланы Мустафир да кёп аламат бериуле хазырлагъанды. Токумаланы Лейла уа телевиденияны бир жарыкъ жулдузу эди. Ол бериуюнде Мечиланы Кязимни, Къулийланы Къайсынны, башха белгили жазыучуларыбызны да поэмаларын, суфлёр бла да хайырланмагъанлай,  кёлден айтып къоючу эди,- дейди Арипа.

 Бюгюнлюкде  «Къабарты-Малкъар» ГТРК-да  эки жюзден аслам адам урунады, ала ишлерин кёллери бла сюйген инсанладыла. Бериулери тап болур ючюн, эрттенликден кече сагъат экиге дери кюрешген кезиулери да болады аланы. Жангылыкъла, тематикалы бериуле эм радио бёлюмле бардыла, ала къабарты, малкъар эм орус тилледе бардырыладыла. Кёп магъаналы информацияланы келишдирип, къараучуланы къууандыргъан журналистлени санында Герийланы Сафарды, аны таулу миллетде танымагъанда болмаз. Режиссёрланы таматасы Жангоразланы Мариямды.

 - Радиону айтханда, алтын фондда  Отарланы Омарны, Къулийланы Къайсынны, башха белгили адамларыбызны да кеслерини ауазлары бла айтылгъан чыгъармаларын  сакълаялгъан, ол жаны бла къыйын салгъан инсаныбыз а Тебердиланы Мариямды. Ол кетсе, не боллукъду фондубузгъа деп сагъыш да этеме. Дагъыда Ахкёбекланы Элдарны, Геляланы Сахадинни, бул-бул ауазлы Созайланы Илиясны да къыйынлары уллуду,- дейди ушакъ нёгерибиз.

«Къабарты-Малкъар» ГТРК-ны директору Людмила Казанчеваны оноуу бла мында «Добрая среда» жандауурлукъ проект бардырылады, аны чеклеринде  «Мультклуб» къуралгъанды. Ары хар бараз кюн саулукъларында заранлары болгъан сабийле келедиле. Алагъа анда телевиденияны ишини барыууну юсюнден билдиредиле, айныуларына себеплик этген амалла къурайдыла. Биргелерине  попечитель советге таматалыкъ этген, Нальчик шахарда ЗАГС-ны башчысы Валентина Шериева келеди. Ол хар сабийни да энчилигин билген, аланы таза жюреги бла сюйген адамды. Дагъыда сабийлени дайым эс бургъан специалист  Османланы Хыйсаны жашы Исламды.

«Келген сабийчиклени биринчи кезиуде саулукълары осал эсе да, бюгюнлюкде ала тап сёлиширге юйреннгендиле. Мында ишлеген адамланы да танып, атларын айтып башлагъандыла, ол а алагъа бек иги жетишимди. Быллай проектни хайыры бла, ала абаданла болсала да, юйлеринде окъуна Интернет бла кеслерине гыржыннга ахча этерге онглары болур деп ышанабыз», - дейди Арипа.

«Къабарты-Малкъар» ГТРК-ны ахшы проектлери, белгилисича, асламды, ала барысы да жетишимлидиле. Сёз ючюн, былтыр Дагъыстанда бардырылгъан «Евразияны ауазы» деген Битеуроссей фестивальда «Добрая среда» проект биринчи жерни алгъанды. Ызы бла Къабарты-Малкъарда ол грантха тийишли болгъанды. Расул Гамзатовну туугъан кюнюне аталгъан кинофильмлери да эришиуледе биринчи жерге чыкъгъанды. Кёп болмай а Тобольск шахарда ВГТРК къурап «Человек и вера» деген Битеуроссей фестиваль бардырылгъанды. Анда Зольск районда онтогъузунчу ёмюрде килиса ачхан  оруслу тиширыуну юсюнден кинофильмлерин кёргюзтгендиле бизникиле. Аны баш жигитини ролюн а таулу къыз Байкишиланы Марина ойнагъанды. Ол чыгъарма да фестивальда алчы жерни алгъанды.

Дагъыда Къубадийланы Нюржанны энчи белгилерчады, ол жыл сайын битеуроссей эришиуледе алчы жерлеге тийишли болгъанлай турады. Алайды да, рейтинг бла къарагъанда, токъсаннга жууукъ филиалланы арасында бизники тёрт эм игини санына киреди.

- Бюгюнлюкде ишлерини тынгылы билген, жаш тёлюбюз да асламды, аланы санында Герийланы Жамиля, Рахайланы Жаннета, Жаболаны Асият. Ала бизни ызыбыздан телевиденияны ишин къолгъа алып, аны андан ары бардырлыкъдыла деп ышанама, анга бек къууанама.

 Жюреклеринде чыгъармачылыкъ отлары болгъан, келип ишлерге сюйген къызлагъа бла жашлагъа да бек ыразы боллукъбуз, - дегенди ушагъыбызны ахырында Арипа.