Бармакъларыгъыз ариу кёрюнюрча

Тиширыула къолларына бла тырнакъларына аслам эс бёлгенлерин барыбыз да билебиз. Жылдан-жылгъа аланы тап халда тутуу ызда жангы амалла чыгъадыла. Ол санда ариу бояуда бла  дизайнда да. Бир жыл алгъа бек омакъ кёрюннген, быйыл магъаналыгъын тас этип къояды. Бюгюннгю сайламада шендю тырнакъланы къалай боямазгъа кереклисини юсюнден айтырыкъбыз. Бу ишде мени консультантым а тырнакъ уста Жангоразланы Хакимни къызы Светланады (@svetik_nail_nalchik). 

- Бек биринчиден, асыры узун тырнакъла тюненеги кюнде къалгъанларын чертирге сюеме, дейди Света. - Аны бла бирге юслеринде кёзге бек уруннган суратланы да энди этдирип къыйыналмагъыз.

Тырнакъланы формаларыны юслеринден айтханда, къыйырларын чюйча ишлетген да къалгъанды.Бюгюннгю модада бир азчыкъ ёсюп, тёртгюлюрек этилгенледиле. Аланы барысын да тюрсюнлю бояулагъа бояу да къалгъанды дерге боллукъду. Дагъыда  бир къолда эки тырнакъны бирча, къалгъанларын да башха тюрлю этиуню да бир бёлек заманнга дери унутур заман жетгенди. Тюрлю-тюрлю жаныуарланы суратларына да жер жокъду шёндю тырнакъланы юслеринде. 

 Манга келгенлени араларында, маникюрден тышында, жалгъан тырнакъла ишлетирге сюйгенле да асламдыла. Ол да не бла байламлыды десенг, бюгюннгю тиширыуланы  заманлары азды ыйыкъ сайын аланы тап халгъа келтирип турургъа. Ол себепден ариулукъдан тышында да, ала тынчлыкъны сайлайдыла.    
Къысхасын айтханда, модада классикады - бир тюрсюннге боялгъан, узун ёсмеген тырнакъла.