Элде жашагъанлагъа себепликле

 Къабарты-Малкъар Республиканы жаш тёлюню ишлери жаны бла министерствосуну эм Россейни элде жаш тёлюсюню биригиуню болушлугъу бла КъМКъАУ-да Эл жаш тёлюню Шимал Кавказ «Команда 5642» деген форуму болгъанды. Аны баш мураты элледе уруннган жаш адамлагъа себеплик этерге, аланы тутхан ишлерин айнытырча амалла къурауду. Программагъа семинарла, регионла бла бирлешип этген оноула киргендиле эм анда Росмолодёжьну грант эришиулерине къошулургъа кереклиси белгиленнгенди.

Форумгъа Шимал Кавказны регионларындан жюзден аслам адам къатышханды. Аланы санында жаш биригиулени келечилери, коммерциялы болмагъан биригиуле, билим берген организацияланы келечилери эмда проектлени жашауда бардырыргъа умутлу жаш адамла да аслам эдиле.

Республикагъа келген къонакъланы барысына да жарыкъ тюбегендиле, Нальчикде табийгъатны ариулугъу бла шагъырейлендирип, мында къаллай амалла болгъанларын, не тюрлю проектлени бардырыргъа тийишлисин да айтхандыла. Ызы бла Къабарты-Малкъар къырал аграр университетде тюбешиуню ачылыууна чакъыргъандыла.

-Багъалы къонакъла, Шимал Кавказны эллеринде жашаугъа уллу эс буруу бу проектни баш муратыды. Жаш адамла урунуп, аякъ тиреп, эл мюлкде жетишимлеге жетерча амалла къураргъа керекбиз. Форумгъа Чечен, Дагъыстан, Ингуш, Къарачай-Черкес, Шимал Осетия-Алания республикаладан эм Ставрополь крайдан да кёп жаш адам келгенине ыразылыгъымы айтама. Мындан ары да бир болуп тутхан ишибизни бардырырбыз деп ышанама, - дегенди КъМР-де эл жаш тёлюню Россей биригиуюню башчысы Эльдар Шонтуков.

Жаш адамлагъа кеслерини оюмларын билдирир мурат бла тюбешиуге бу жаны бла жетишимли абаданла да аслам къошулгъандыла, дагъыда кёп белгили инсанла, къуллукъчула да.

КъМКъАУ-ни ректору Аслан Апажев проектни университетде бардырылгъанына ыразы болгъанын айтханды. Алада окъугъан студентлени арасында мындан арысында эллеринде жашау этерге сюйгенлени саны аз болмагъанын чертгенди. Алай алагъа ол жаны бла билим бергенден сора да, амалла къураргъа кереклисин да белгилегенди ол. Быллай жыйылыулада уа жангы проектле къурап, жаш тёлюге себеплик этерча онгла болгъанларын да белгилегенди Апажев.

Форум КъМР-ни Башчысы Казбек Коковну бла республиканы Правительствону ыразылыкълары бла бардырылгъанды. Бир-бирлени тюбешиуге келирге амаллары болмагъанлыкъгъа, Интернетни хайыры бла ала да форумгъа къошулгъандыла, анда чыгъарылгъан оноладан хапарлы болгъандыла. Жыйылгъанланы санына Интернет бла къошулгъан Россейни эл жаш тёлюсюню биригиуюню башчысы Сергей Харахашяннга да сёз бергендиле. Ол, самолётну рейслери келишмегени ючюн, ол кюн келирге онгу болмагъанлыкъгъа, Шимал Кавказны айныууна уллу себеплик этген проект башланнганына къууаннганын билдиргенди.

Тюбешиуню биринчи кесеги бошалгъандан сора барысы да бирге суратха тюшгендиле, ызы бла келгенле тематикаларына кёре майданлагъа бёлюннгендиле.

Форум юч кюнню бардырылгъанды. Хар анга къошулгъан адам кесини проектине хайырлы затланы билирге амалы болгъанды. Жыйылгъанла бир бирлери бла танышып, мындан ары да ишлерини юсю бла байламлыкъ жюрютюрге оноу этгендиле. Тюбешиуню ахырында къонакълагъа Чирик кёлню тёгерегин кёргюзтгендиле, миллет ашарыкъла бла сыйлап ашыргъандыла.