Коммунал жумушла ючюн тёлегенде…

Коммунал жумушла ючюн тёлеуню банклада бергенде, ала аны юсюне комиссия къошхан тёре барды. Аны кетерсе, хайырланыучулагъа иги боллукъ эди деген хапарла жюрюгенли, сейирлери болгъанла да ол жаны бла мадар этерге кюрешгенли талай жыл болады. Тийишли законну проектин Къырал Думада 2020 жылны аллында окъуна сюзген эдиле. Анда бу къошакъ тёлеуден гражданланы барын да эркин этерге керекди, деп айтыла эди. Алай банкла уа аны жаратмагъандыла, бир да болмаса, ол къошакъны ЖКХ организацияланы боюнларына салыргъа чакъыргъандыла. Аны эшитгенде уа, экинчилери ыразы болмагъандыла.

Бу кюнледе Къырал Дума ол законну жангыдан жарашдырылгъан проектин къабыл этгенди. Анда жазылгъаннга кёре, комиссия тёлеу кетерилмегенди, жеринде къалгъанды. Алай социал болушлукъгъа тийишли болгъанладан а аны аллыкъ тюйюлдюле. Тизмеде инсанланы къайсы къауумлары боллугъун Правительство белгилерикди. Башхала уа, квитанциялары бла банкланы офислерине барсала, 2 процент комиссия тёлерикдиле.

Бу документни энергоресурсла бла жалчытхан компанияла, банкла, тынгылы ремонт этген регион операторланы биригиую, суу бла эмда канализация жумушланы жалчытыу бла кюрешгенлени Ассоциациясы дурус кёргендиле.

Банклада айтханларына кёре, шёндю гражданланы экиден бири бу комиссияны ансыз да бермейдиле. ЖКХ жумушла эмда ресурсла ючюн тёлеулени 70 проценти башха-башха жерледен жибериледи, бир тюрлю къошакъсыз. Энтта да 20 проценти интернет неда мобильный банкла бла келедиле; аладан жыйылгъан комиссия 1 процентден аз болуучуду. Алай бла банкланы офислерине барып, аллай жумушланы багъасын хайырланыучуланы жаланда 10 проценти тёлейди: 2 процент комиссияны да ма ала бередиле. Саулай къыралда жашау журт-коммунал жумушла ючюн тёлеулени ёлчеми 3,5 триллион сом болгъанын эсге алып тергегенде, ол комиссия къошакъны ёлчеми бир жылгъа 14 миллиард сомгъа жетеди.

«Банкланы быллай комиссия тёлеулерин кетериу жаны бла кюрешиу бошалгъанды дерге боллукъду. Аз алгъаракъда окъуна ол энди чыртда боллукъ тюйюлдю деп ышаныу бар эди, энди уа андан инсанланы жаланда талай категорияларын эркин этгендиле. Банкирле айтханларына кёре, ала къоранчларын башха жумушланы багъаларына къошуп къайтарыргъа боллукъдула», - дегендиле Къабарты-Малкъарны кёп фатарлы юйлеге тынгылы ремонт этиу Фондунда.