Узакъ ёмюрлюкге себеплик этген къоз

Адамны чархына кюн сайын элементлеге бай, жюрекни къанны тартыу ишине себеплик этген, терк тойдургъан эм иги кесекни ач болмазгъа болушхан къозладан бири миндальды, дейди Москвада Жарыкъландырыу къырал университетни адамны физиологиясы, экология эм медико-билим жаны бла кафедрасыны доценти Александр Созыкин. 

Бу къозда бек керекли аминокислотала, белок, Омега-3, клетчатка, Е, В2, В7, В12 эм башха витаминле, калий, кальций, хром, марганец, магний, медь бла фосфор асламдыла. Биолог чертгенича, миндаль жюрек-тамыр аурууланы профилактикасында болушханындан тышында, быллай ауруулары болгъан адамлагъа дарманны алышындырмаса да, ёлюмню уа азайтады. Биринчиден, ол холестеринни мардагъа келтиреди, анга шагъатлыкъны диетологланы тинтиулери этедиле. Экинчиден, анда болгъан Е витаминни хайыры бла адамны чархында антиоксидантла къураладыла, ала уа холестеринни къаннга тюшюртмейдиле, алай бла тамырла атеросклеротический бляшкаладан сакъланадыла. Ючюнчюден, аны хар кюнден да ашха къошуу артериальный къан басымны тюшюреди эм ич органлагъа къанны келиуюн тынч этеди. 

Магнийи да болгъаны ючюн миндаль къанда бал тузну азайтады, инсулиннге да хайыры болуп, диабетни экинчи тюрлюсюнден къыйналгъанлагъа себеплик этеди. Бир кюннге 10-16 къоз ашасагъыз тамамды, деп билдиредиле лайф.ру сайтда.

Аны бла чекленмей, ол мардадан озуп семизлик бла кюреширге да болушады, анда белок бла клетчатка асламдыла, углеводла уа аздыла. Железо бла витаминлерини кёплюлюгю уа гемоглобинни ёлчемин ёсдюреди, алай бла анемияны да ахшы профилактикасыды. Алай аны бла бирге миндаль аллергияны къозгъаргъа боллугъун да унутмагъыз, къозла жарашмагъан адамла сакъ болургъа тийишлидиле. Сора, аны бла асыры кёп ауузланыу жирлени кёбейтип, жюрекни терк урдурлукъду. Алай бла хайырлы азыкъны мардадан оздурмасагъыз, хайырын кёрлюксюз.