Газ урлагъанла тазир тёлерикдиле

«Газпром межрегионгаз Нальчик» компанияны специалистлери, жер-жерли администрацияланы келечилери бла бирге быйыл Къабарты-Малкъарда 4200 чакълы юйде болгъандыла. Ала бары да газ ючюн борчлары болгъанла эдиле. Тёлеулени заманында берселе, ол кеслерине иги боллугъун ангылатыргъа кюрешгендиле контролёрла. Дагъыда шёндюгю амалла, ол санда онлайн-сервисле бла да шагъырейлендиргендиле. Алагъа къулакъ салгъан 1150 абонент борчларын жабаргъа ашыкъгъандыла; саулай айтханда, 17 миллион сом жыйылгъанды. Аны хайырындан а юйлерине баргъан газ кесиллик тюйюлдю, кеслери да тазирледен къутуллукъдула.

Специалистле дагъыда 1750 юйде газ быргъылагъа соргъан-сурагъан этмей къошулгъанларын эслегендиле. Бузукълукъ этгенле 93 миллион сом багъасына заран салгъандыла. Аллай шартланы юсю бла актла жазгъандыла, ол абонентлени газларын кесгендиле, ишлерин а, жууапха тартырча, правону къоруулаучу органлагъа жибергендиле.

«Быллай затла бла кюрешгенле къуру компаниягъа заран салып къоймай, кеслерине да къоркъуу келтиредиле. Газны къоркъуусуз хайырланыуну жалчытырча биз быллай жумушла бла дайым кюрешгенлей турабыз», - дегенди «Газпром межрегионгаз Нальчик» компанияны башчысы Залим Вороков.