Уллу алим, керти инсан

Алтынчы декабрьде Къабарты-Малкъарны Т.К.Мальбахов атлы къырал миллет библиотекасыны миллет эм краеведение бёлюмюнде малкъар тилни бла адабиятны сюйгенлени «Тейри къылыч» клубунда «Фахмулу алим, огъурлу адам» деген тюбешиу къуралгъанды. Ол философия илмуланы доктору, профессор. КъМР-ни искусстволарыны сыйлы къуллукъчусу, Россейни Журналистлерини, Жазыучуларыны союзларыны члени, белгили алим эм жамауат къуллукъчу Эфендиланы Ибрагимни жашы Салих туугъанлы 90 жыл толгъанына аталып жыйылыу болгъанды. Аны илму-педагогика, жамауат иши къыркъ жылдан артыкъны Къабарты-Малкъар Х.М. Бербеков атлы къырал университети бла байламлыды.

Эфенди улуну башчылыгъында он адам философия илмуланы кандидатына диссертацияларын къоруулагъандыла. Илмугъа салгъан къыйыны ючюн анга ЮНЕСКОНУ  махтаулу къагъыты берилгенди.

Тюбешиу философия илмуланы доктору, Искусстволаны Шимал-Кавказ институтуну культурология кафедрасыны профессору, илму жаны бла КъМР-ни Къырал саугъасыны лауреаты, РФ-ни Жазыучуларыны союзуну члени Эфендиланы Салихни жашы Фуад, философия илмуланы доктору Шауаланы Харунну жашы Исмайыл, КъМР-ни халкъ поэти Беппайланы Азнорну жашы Муталип, философия илмуланы кандидаты, этнограф Жангоразланы Хажи-Муратны жашы Мухаммат, радиожурналист Геляланы Сахадин къатышхандыла.

Ары келгенлени аллында библиотеканы алчы китапханачысы Мичиланы Халимат сёлешгенди. Ол Эфенди улуну жашау эм чыгъармачылыкъ жолларыны юслеринден айтханды. Салих Ибрагимович жазгъан китапланы юслеринден билдиргенди, профессорну Къайсыннга атагъан бир ненча тому барды, дегенди.

Библиотеканы алчы библиографы Махийланы Азиза уа «Илмуда махтаулу адамла» деген докладын окъугъанды, алимни чыгъармачылыкъ жолуну юсюнден да айтханды. Къайсы китабы къалай жазылгъаныны, алада нени юслеринден айтылгъанларын да эсгергенди.

Салих Ибрагимовични юйдегиси Тамара Емельяновна, жашы Фуад бла жазгъан чыгъармалары да бардыла. Аланы юслеринден да толу айтылгъанды эсгериу ингирде.

Беппайланы Муталип да Эфенди улуну юсюнден кёп ариу, жылы сёз айтханды. Салих Ибрагимович жазыучуланы ишине тири къатышханын, кёп белгили адамланы юбилейлерин къурагъанын да эсге тюшюргенди, ол санда Макъытланы  Сафаргъа, Шахмырзаланы Саидге, Кациланы Хабугъа эм башхалагъа. Андан сора уа Эфенди улугъа атагъан назмусун орус, малкъар тилледе окъугъанды.

Жангоразланы Мухаммат, Геляланы Сахадин да Салих бла эсгериулерин айтхандыла. Аны бла шагъырей болгъаныбыз бизге уллу къууанч, насып эди. Ол бизни эсибизден кетерик тюйюлдю дегендиле ала.

Фуад Салихович атасына жоралап жыйылыу къурагъанлагъа жюрек ыразылыгъын билдиргенди. Алагъа, келген къонакълагъа да алгъышла, ариу сёзле айтханды.

Ол кюн ары келгенлени араларында Къабарты-Малкъар къырал университетини медколледжини бла педколледжини студентлерини къаууму болгъанды. Ала сёлешегенлеге тынгылап, китап кёрмючге къарап, кёслерине дерс алып кетгендиле.

Халкъыбызны, республиканы да сыйлы инсанларындан бири Эфендиланы Салихге аталгъан жыйылыу эки сагъатдан артыкъ баргъанды. Тюбешиу ары келгенлени эслеринде сакъланырыкъды.