Чыпчыкълагъа - сюймеклик бла къайгъырыулукъ

Жаз башыны ахшы шартларындан бирине чыпчыкъланы уяларына  къайтханларын санаргъа боллукъду. Ол себепден апрельде  Къанатлыланы халкъла аралы кюню белгиленнгени бек  аламатды. Аны мураты  - аланы сакъларгъады, алагъа аяулу кёзден къараргъады. 
Къабарты-Малкъарны къырал бийик тау заповеднигини келечилери, ол кюннге жоралап, хар замандача,  уллу акция бардыргъандыла.  Бу жол анга школчула бла бирге  сабий садлагъа жюрюгенле эм абаданла да къатышхандыла. 
Нек дегенде ол уллугъа-гитчеге да бирча магъаналыды. Нальчикден Зока улуну атын жюрютген 8-чи номерли орта школну бла  3-чю номерли сабий садны келечилерине специалистле оюн халда къанатлыланы юсюнден толу хапар билдиргендиле. Уяла ишлерге, аланы тап жерлеге эм тюз   орнатыргъа  юйретгендиле. Акциягъа къатышханланы барына да дипломла эм саугъала да берилгендиле. 
Заповедникни келечилери Аушигерни  окъуучулары бла  да тюбешген эдиле. Алагъа Россейде тургъан къанатлыланы юслеринден хапар айтхандыла, презентацияла, видеороликле да кёргюзтгендиле. Ызы бла чыпчыкъланы юсюнден викторина бардырылгъанды. Андан сора да, окъуучула заповедникни табийгъатыны музейинде болгъандыла. Ахырында уа хорлагъанлагъа эсде къалырча  саугъала берилгендиле. 
Къашхатауну «Радуга» сабий садыны келечилери уа кеслери ишлеген чыпчыкъ уяланы учрежденияны  терек бахчасында такъгъандыла. Энди гитчеле хар кюнден аланы келип къоннганларына къарап къууанадыла. Огъары Малкъардан Абай улуну атын жюрютген 2-чи номерли орта школда жаш экологну кружогуну келечилери уа заповедникни ишчилери бла бирге ачыкъ дерсде къанатлылагъа уяла ишлерге юйреннгендиле. 
Акциягъа Нальчикни 28-чи номерли орта школуну окъуучулары да тири къатышхандыла. Алагъа республиканы тамаша табийгъатыны юсюнден лекция окъулгъанды, кино да кёргюзтюлгенди. Ахырында уа сабийле кеслери ишлеген уяланы школну къатында эмда солуу паркда орнатхандыла. Саулай айтханда, быйыл  акциягъа  республиканы школларындан эки жюзге жууукъ сабий къатышханды. 
Онжетинчи апрельде уа заповедникде  «Знатоки птиц» деген республикалы КВН боллукъду. Анда хорлагъанлагъа дипломла бла эсде къалырча саугъала берилликдиле.

 

Тогъузаланы Лейля. КъМР-ни къырал бийик тау заповеднигини таматасыны орунбасары.

Свежие номера газет Заман


18.04.2018
16.04.2018
13.04.2018
11.04.2018