Солугъанланы къоркъуусузлукъларын жалчытырча

Россейни Экономиканы айнытыу министерствосунда видеоконференция халда регионланы къыш турист кезиуге хазырлыкълары тинтилгенди. Бу жумушда эм уллу жууаплылыкъ МЧС-ге салынады, анда иш къалай тамамланылгъаныны юсюнден ведомствону Баш управлениясыны таматасыны орунбасары Сергей Воронцов билдиргенди.

Жолоучулукълагъа къауум-къауум болуп эм кеслери алларына чыкъгъан адамланы, ол санда акъылбалыкъ болмагъан туристлени эсепде тутуу, ажашханлагъа бла ачыгъанлагъа болушуу – ала барысы да ведомствону къарауундадыла. Солугъанла къыйын  болумлагъа кюнню халы аман болгъанда асламысында кеслерини неда маршрутланы къурагъанланы уллу кёллюлюклерини хаталары бла тюшедиле. Экскурсиялагъа чыкъгъанла къайсы жолла бла барлыкъларын эсепге салыуну магъанасы да аны ючюн уллуду – аны хайыры бла ала къайда ажашханларын табыу тынчыракъ болады. Ол хыйсапдан туристле экскурсиягъа атланырдан алгъа бек азындан он кюннге алгъа МЧС-ни жер-жерли органларына маршрутларын билдирирге керекдиле. Алагъа тынчлыкъгъа бу жумушну онлайн халда министерствону интернет-порталында «Турист къауумланы эсеплеу» деген кесегинде толтурурча да этилгенди.

 Тарихлени келтирип айтханда, былтыр къышда 2,3 минг турист къауум – 35 мингден аслам адам чыкъгъандыла. Излеу-къутхарыу операциялагъа министерствону бёлюмлери 270 кере чыкъгъандыла, алада 480 адамгъа, аладан 60-дан асламысы уа сабийледиле, жашауларын сакълагъандыла. Белгилерге тийишлиди – ол тас болгъан адамладан жангызда 140 эсепге салыннган къауумладан эдиле.