ГЭС-ле къышха хазырдыла

«РусГидро» компанияны Къабарты-Малкъарда бёлюмю келир къыш кезиуде чырмаусуз ишлерге хазыр болгъанына шагъатха тийишли паспорт алгъанды. Компанияны пресс-службасындан билдиргенлерича, ол ишге къарагъан комиссия бу кюнледе тинтиуле бардырып бошагъанды.

Аны къауумуна Ростехнадзорну, МЧС-ни, республиканы Энергетика, тарифле эмда жашау журтлагъа надзор этиу жаны бла къырал комитетини келечилери киргендиле. Ала бёлюмню битеу ГЭС-леринде тийишли жумушла заманында эмда толусунлай тамам этилгенин чертгендиле. Оборудованиягъа кезиулю эмда тынгылы ремонт этилгенин, станциялада уруннганла бла авариялагъа къажау юйретиуле бардырылгъанын да белгилегендиле.