Келишим этерге унутмагъыз

Юй неда фатар къоллу болгъан инсан ток бла жалчытыучу компания бла да келишим этерге керекди. Ол борчну иеликге тохташхандан сора отуз кюнню ичинде тамамларгъа тийишлиди, деп билдиргендиле «Каббалкэнерго» компанияны пресс-службасындан.

Юйню жангы иеси счётчикни кёргюзтюулерин жазып алыргъа, ызы бла компаниягъа ашырыргъа керекди. Аны юйню алыу-бериу къагъытына тюшюрсе да, хатасы боллукъ тюйюлдю. Келишимлени къалай къураргъа боллугъун компанияны сайтында (http://kabbalkenergo.ru/klientam/tipovye-formy-dogovorov) билликсиз.

Электрокюч бла жалчытыуну юсюнден келишим этерча, паспортну, юйге ие болгъаныгъызгъа шагъатлыкъ этген къагъытны, анда регистрацияны юсюнден справканы да алып, компаниягъа барыргъа тюшерикди. Адам ток ючюн биринчи кере тёлегенлей, аны бла келишим къабыл этилгеннге саналады. Предприятияла неда организацияла бла уа къагъытха къол салып этедиле аны.