Жолда къоркъуусузлукъну жалчытыргъа себеплик этиуню къыйматлы амалы

Жолда жюрюуню къоркъуусузлугъун жалчытыуда беспилотниклени хайырланыуну концепциясыны проекти жарашдырылгъанды. Документ «Къоркъуусуз эмда тынгылы автомобиль жолла» миллет проектге кёре жарашдырылгъан «Жол мюлкню айнытыуну битеусистемалы мадарлары» федерал проектде белгиленнген мадарланы бир кесегиди. Аны баш магъанасы – жоллада жюрюуню къоркъуусузлугъун кючлендириудю.

Проект Россей Федерацияны Президентини «Россей Федерацияны 2024 жылгъа дери айнытыуну миллет муратларыны бла стратегия борчларыны юсюнден» 2018 жылда 7 майда чыгъарылгъан 204-чю номерли Указына кёре къуралгъанды. Анда жолда аварияланы онг болгъаны къадар азайтыргъа, транспортну саулай да  автоматизацияланнган тюрлюлерин хайырланыу бла бардырылыргъа боллукъ  террорчулукъ ишледен, тюз да аллай амал бла жолда жюрюуге чырмау этиуден, кибер атакаладан къорууланыуну жалчытыргъа белгиленеди.    

Концепцияда дагъыда автоматизацияланнган транспортну къоркъуусуз жюрютюу жаны бла юйретиуле бардыла, жол-транспорт инфраструктурагъа баш излемле, беспилотниклени хайырланыргъа боллукъ сферала белгиленнгендиле, транспортну автоматизацияланнган тюрлюлерин сингдириуню социал-экономика файдасы да тергелгенди. 

Битеу бу мадарла бёлюмню цифрализациягъа кёчюрюу жаны бла кезиулю атламларыдыла. Ала транспорт инфраструктураны къоркъуусузлугъун кючлендириуге, жангы жумушла къураугъа, аланы тынгылы тамамлаугъа бурулупдула. Бек башы уа – адамны хатасындан аварияланы азайтыргъа онг чыгъыуду. Анга уа водительге болушурукъ тюрлю-тюрлю системала бла жалчытылгъан автомобильле эмда транспортну пилотсуз жюрютюлген тюрлюлери себеплик этерикдиле. 

Концепцияны проекти жолда жюрюуге беспилотниклени сингдирир, жол инфраструктураны игилендирир эмда бу сферада бир политиканы къурар муратда жарашдырылгъанды. Аны хазырлаугъа  Россейни Транспорт министерствосу тири къатышханды. Ведомствону буйругъу бла «РосдорНИИ» федерал автоном учреждение ары дери уллу тинтиу иш бардыргъанды.