Баш борч – адамланы жашауларын сакълау

МЧС-де дознавательни иши бек жууаплыладан бириди, бир жерге къыйынлыкъ тюшгенини юсюнден билдириу биринчилени санында анга келеди. Адамланы къутхарыу ишин Къазакъланы Адам 2007 жылда, МЧС-ни Воронежде от ёчюлтюу-техника училищесин бошагъанлай башлагъанды, алгъа Нальчикде от тюшюу надзорну инспектору болгъанды. Ол заманда окъуна туугъан Черек районуна дознаватель къуллукъгъа кёчгенди, анда 15 жылны от тюшгенни сылтауларын ачыкълау бла кюрешеди. Ишин бардыргъандан тышында, ол юйрениуню да къоймагъанды – Шёндюгюлю гуманитар академияны тауусханды, ведомствону вузларында квалификациясын ёсдюргенди. Бюгюнлюкде ол МЧС-ни Черек районда надзор эм профилактика иш бардырыу жаны бла бёлюмюнде дознаватель болуп урунады.

- Дознаватель ишде кече-кюн да турады. Къыйын болумну юсюнден билдириу келгенлей, мычымай жолгъа чыгъыу баш борчларыбыздан бириди. От тюшген жерге жетгенлей, мен алайны тинтирге, адамланы араларында соруу бардырыргъа, документлени хазырларгъа керекме, - деп ангылатады Адам. – Дознавательле къыйын болумну юсюнден информацияны аз-аздан жыядыла. От жаннганыны сылтауун табар ючюн а, кюлден бла кёсеу башладан къуралгъан тёбелени къазаргъа тюшеди. Биз адамланы бла мюлклени от тюшюуден сакъларгъа керекбиз, аны ючюн а къыйын болумгъа къаллай чурумла келтиргенлерин тохташдырыргъа тийишлиди.

Дознаватель болгъанындан тышында, Адам жууаплы участкасында мекямланы бла журтланы от тюшюуге къажау болумларын тинтеди, адамланы бу жаны бла тарыгъыуларына къарайды. Ол профилактика халда жамауат бла ангылатыу ишни да тамамлайды.

Кёп жылланы бет жарыкълы уруннганы, ишине жууаплы кёзден къарагъаны ючюн Къазакъ улу кёп саугъа бла да белгиленнгенди. Алай эм сыйлы саугъасы уа былтыр майда этген жигитлиги ючюн берилгенди. Кече Къашхатауда юйлени бирине от тюшгенди. Ол кезиуде Адам нёгери бла кесини машинасында алайда бара болгъанды. Ала олсагъатлай жана тургъан юйню арбазына чабып киргендиле, анда жукълап тургъан адамланы уятып, къоркъуусуз жерге элтгендиле, от ёчюлтюу-къутхарыу службаны чакъыргъандыла. Кёргюзтген усталыгъы, адамланы жашауларын сакълауда тюз оноу этип, аны таукел толтургъаны ючюн МЧС-ни регионда Баш управлениясыны таматасы ич службаны генерал-майору Михаил Надёжин анга энчи ыразылыгъын билдиргенди эм управленияны сыйлы грамотасы бла саугъалагъанды.

Уруннган 15 жылыны ичинде Адам 900-ден аслам материал жарашдыргъанды. Биргесине ишлеген нёгерлери аны юсюнден айта, огъурлулугъун, болушургъа хазыр, жууаплы инсан болгъанын чертедиле. Уллу жетишимле болдургъанына себепликни уа анга алгъа жыллада спорт бла кюрешгени да этеди, ол грек-рим тутушуудан спортну устасына кандидатны, бусагъатда жюзюу эм чабыу бла кюрешеди.

Къазакъ улу юйюр да къурагъанды, юй бийчеси Елена бла бирге жашлары Сулейманны бла юч къызлары Милана, Амина эм Диананы ёсдюредиле. Сулейман да, грек-рим тутушуудан жараулагъа жюрюйдю эм, атасыча, къыйын болумгъа тюшген адамлагъа болушургъа мурат этеди.