Жюзюм бахчада кюздеги ишле

Келир жылда бай тирлик алырча, жюзюм бахчагъа кюзде тынгылы къарамай боллукъ тюйюлдю. Анда къурт-къумурсхаланы къырыргъа, тереклени артыкъ ёсген бутакъларын кесерге, жерни да тазалап, семиртгичле жаяргъа керекди, дейдиле Россельхозараны Къабарты-Малкъарда бёлюмюню специалистлери.

Бу кезиуде ишлени юсюнден айтханда, тирлик жыйылгъанлыкъгъа да, жюзюм тереклени сугъарыуну унутургъа жарамайды. Аны салкъын неда сууукъ кюнледе этерге керекмейди, алай октябрьни орта, бек кеч къалса уа – ахыр кюнлеринде тамамларгъа тийишлиди.  Бу кезиуде хар терекге да суу мардасы бла салынады.

Ызы бла дарман сепсе да боллукъду. Алай аны этерден алгъа жюзюмню бутакъларына къарагъыз. Аны юсюнде аурууланы ышанларын неда заранлы къурт-къумурсхала болгъанын эслесегиз, къоруулау препаратланы хайырланмай жарарыкъ тюйюлдю. Аны аллында уа фитосанитария тинтиуле бардырыргъа тийишлиди. Аны Россельхозараны специалистлери эталлыкъдыла, кеслери да къаллай дарман керек болгъанын жик-жиги бла айтырыкъдыла.

Терек сау эсе, юсюнде не ауруу, не заранлы зат жок эсе да, профилактика жумушла бла къутулургъа боллукъду. Анга инсектицидле эмда фунгицидле себедиле, кеслерин да къоркъуусузлукъну излемлерине сакъ болуп алай. Ол айтхан а неди: жел болмагъан, шош кюн хайырланыргъа, препаратла жерге тёгюлмезча сакъ болургъа.

Жюзюм тереклени семиртгичле бла багъаргъа керекди. Тирликни жыйгъандан сора, аланы тюплерин къазадыла, ары суу бла къатышдырып мешхут къуядыла.

Жайда ёсюм алгъан терекни бутакъларын кесип къысхартыргъа керекди. Бу ишни аны уллулугъуна, сортуна, жерине кёре этедиле. Аны къайсысы иги болгъанын билмей эсегиз, специалистле бла оноулашыргъа керекди.

 Бутакъла къышда къар басып сынмазча, аланы энишге бюгюп, абериге къысаргъа керекди. Алай жерге жетдирирге уа жарамайды. Аланы темир неда агъач къылычлагъа къысаргъа боллукъду. Жанларына уа къургъакъ салам жайса игиди. Бу ишни шёндю угъай, сууукъла башланнгандан сора (-6 - 9 градус) талай кюн озуп (бутакъла кюч алырча) этерге керекди. Сууукъну чыдагъан бутакъла мор бетли боладыла.

Жюзюм тереклеге кюзде къарау бек магъаналыды. Келир жылны тирилиги ол шёндю къалай этилгенине кёре боллукъду. Аны ючюн бахчагъа уллу кёллю болмагъыз, ишин этигиз. Билмегенигиз бар эсе уа Россельхозарагъа ма бу номер бла 74-25-74сёлешигиз.