Магъанасы – жамауатны жарыкъландырыргъа

Быйыл 19 ноябрьде Европаны эм бийик тёппесинде - Минги тауну башында «Географиядан диктант» деген кезиулю халкъла аралы акция боллукъду.  Анга къатышханлагъа таплыкъгъа энчи майдан жарашдырыллыкъды.

- Акция биринчи кере Минги тауну башында  3 912 метр бийикликде ётерикди. Анга Россейде жашагъанла  эм башха къыралланы инсанлары  да къошуллукъдула. Аны бардырыргъа  „Кавказ.РФ» биригиуню таматасы   Андрей Юмшанов бла Орус география биригиуню таматасы  Артём Манукян тюбешгенлеринде келишгендиле, - деп билдириледи Шимал-Кавказны айнытыу жаны бла институтуну  пресс-службасындан.

Диктант жазгъанлагъа майдан Къара-Башы бла Онбиреуленни ышыгъы станцияланы арасында орналгъан   «Leaprus» деген  альпинистлени къонакъ юйлеринде къураллыкъды.   Анга къатышыргъа сюйгенле алгъадан заявка берирге эм география жаны бла кеслерине  ачыкълагъан магъаналы темагъа жоралап  эссе жазып,  Орус география биригиуню сайтында белгиленнген адресге жиберирге  керекдиле.

Эсге сала айтсакъ, акция 2015 жылдан бери  РФ-ни  Президенти,  Орус география обществону (РГО) попечитель советини  таматасы Владимир Путинни башламчылыгъы бла бардырылады. Аны магъанасы -  жамауатны географиягъа эсин  бурургъады, кереклисин ангылатыргъады эм Ата журтларын игирек танырча, сюерча этергеди.    2017 жылдан бери уа анга халкъла аралы даража берилгенди. Ол баргъанлы анга 126 къыралдан юч миллион  чакълы адам къатышханды.  Быйыл да аны бардырыр ючюн  тёрт минг майдан ишлерикди.