Школгъа хазырланыргъа болушадалыла

Къабарты-Малкъарда «Сабийни школгъа хазырла» деген жандауурлукъ акция быйыл бла экинчи кере бардырылады. Анга къатышыргъа сюйгенлени саны да ёседи.   Быйыл къолайсыз  юйюрледен  эки мингден аслам   сабийге болушлукъ тапдырыллыкъды.   Ала портфельледен башлап юс кийимге дери жалчытылынныкъдыла.

Акциягъа Чегем районда да  тири къатышадыла. Муниципалитетни Билим бериу управлениясында  волонтёрланы  бла къыралны хайырындан   жыйылгъан школчулагъа керек  абериледен уллу склад къуралгъанды. Ол санда жюзле бла жангы портфельле иелерин сакълайдыла.  Учрежденияны таматасы Жанна Арипшева жангы окъуу жылны аллында быллай жандауурлукъ  тёреге айланнганын айтады.  Анга кёп адам къатышадыла, адрес халда ахча бла болушургъа сюйгенле да аз тюйюлдюле.

Сёз ючюн, бизнесмен Ирина Хагажеева жандауурлукъ   акцияны юсюнден социал сетьледен билгенден сора, кесини баласындан кем этмей, школ   комплектле келтиргенди.   

-  Мени кесими юч сабийим барды. Эм таматам  къызчыкъды.  Ол быйыл биринчи классха барлыкъды. Аны  хазырлагъан кезиуюмде  аны ауурлугъун  сезгенме. Бусагъатда аналаны арасында  къыйын болумгъа тюшгенле кёпдюле. Ол себепден алагъа къолумдан келгенича болушургъа сюеме,- дейди Ирина. 

Заур бла Лариса Ахметовланы сегиз сабийлери барды, аладан тёртюсю школчуладыла. Юйюрню таматасы жангы окъуу жыл  сабийлеге уллу байрам болгъанлыкъгъа,  бизге уа   жунчургъа тюшеди, дейди.   «Аланы толусунлай керек затла бла жалчытыргъа бек къыйынды. Ол себепден  къаллай болушлукъгъа да бек ыразыбыз. Быйыл бу   акцияны хайыры бла  проблеманы тамамларгъа онг табылгъаны бек къууандыргъанды»,-деп къошханды ол.