Электрон жумушланы энтта да бир тюрлюсю

Жоллада жюрюуню  жорукъларын  (ПДД) бузукълукъ этилгени ючюн салыннган тазирни дауларгъа, сюдге эмда правону къоруулау органлагъа заявленияла берирге боллукъду энди къырал жумушланы Интернет порталында. Бу кюнледе анда сынам халда энтта да беш суперсервис сингдирилгенди. Ол санда  «Пенсия онлайн» эмда «Жууукъ адамыгъызны тас этген эсегиз» дегенле да бардыла.

Аланы хайырланып кёрюрге, оюмларын билдирирге сюйгенлеге сервисни электрон адреси ма буду: www.gosuslugi.ru/superservices, деп билдиргендиле КъМР-де МФЦ-ны пресс-службасындан.

Суперсервисле – къырал электрон жумушланы жангы тюрлюсюдюле. Ала гражданла къагъыт документлени аз жюрютюрча эмда къырал органлагъа барып айланмазча деп къуралгъандыла. Сёз ючюн, «Правону къоруулау органлагъа заявленияла бериуде» эмда «Салыннган тазирлени онлайн халда даулауда» документлени жарашдырыу эмда бериу иги да женгилленнгендиле. Кеси да къырал учреждениялагъа барыргъа кереклиси болмай.

«Правосудие онлайн» дегенни хайыры бла иск быллай халда бериледи. Сюдню жыйылыуларына алай къатышыргъа, ишге да ол халда (оноу этилгинчиге дери) кёз-къулакъ болуп турургъа онг бериледи.
«Пенсия онлайн» пенсиягъа деп жыйыла тургъан ахчаны контрольда тутаргъа, урунуу стажны билирге, ызы бла уа пенсияны терк жарашдырыргъа, ахчаны къалай сюйсегиз да алай алып турургъа амал береди.

«Жууукъ адамыгъызны тас этген эсегиз» деген суперсервис а тийишли документлени хазырларгъа, керекли пособияланы алыргъа эмда андан къалгъан ырысхыны кеси атыгъызгъа кёчюрюрге онг береди.
Алгъаракълада быллай суперсервисле кёргюзтюлген эдиле: «Сабий туугъан», «Европротоколну онлайн халда жарашдырыу», «Башха регионнга кёчюу», «Цифралы  толтуруучу производство» эмда «Вузгъа онлайн халда киреме дегенлеге».