Заманында тёлегенлени санына къошула барады

Къабарты-Малкъарда быйыл сегиз айгъа хайырланылгъан электрокюч ючюн  1,2 миллиард сомдан аслам тёленнгенди, ол кёрюмдю  98 процентге жетеди, деп билдиргендиле «Каббалкэнерго» биригиуню пресс-службасындан.

Чыгъарылгъан эсеплеге кёре, тёлеулени эм иги толтургъанла  Черек эм Чегем районлада жашагъанла болгъандыла. Аны бла бирге компания  электрокюч бла ышаннгылы жалчытыу – аны багъасы заманында тёленнгенине кёре тамамланнганын да  эсге салады.

Кёп заманны тёлемей, борч этип тургъанла игилик бла ангыламасала, аланы закон бла жууапха тартырча онг барды.  Аллай амаллагъа: ишлерин сюдге бериу, токну хайырланалмазча чек салыу  киреди. Уллу кёллюлюк этген борчундан тышында  юсюне  тазир да тёлерге тюшерикди. Алай болмазча  уа айны онунчусуна дери  берликлеринден къутулса игиди. Токну багъасын компанияны https://gp-lc.rossetisk.ru/ сайтында «Энчи кабинетде», «Свет онлайн» приложенияда, адамланы жумушларына къарагъан аралада тёлерге жарайды.

Эсге сала айтсакъ, быйыл  «Свет онлайн» приложенияны хайыры бла республикада жашагъан  34 мингден аслам   инсан  37,5 миллиондан аслам сом тёлегендиле. Саулай алып айтханда уа, сагъынылгъан онлайн-сервисни себеплиги бла 50  мингден артыкъ жерлешибиз ток бла жалчытхан биригиуге   52,6 миллион сом ётдюргендиле. Сервисни  GooglePlay - https://play.google.com/ эм AppStore - https://apps.apple.com/ сайтладан алып этерге онг барды. Аны себеплиги бла комиссиясыз тёлерге, эсеплеген приборда  ненча ойнагъанын жиберирге, къайсы айда къаллай бир берилгенине квитанция бла шагъырейленирге болады. Быллай амал энергокюч компания бла  абонентни арасында байламлыкъны бютюн бек кючлегенин да белгилерчады.

«Россети Северный Кавказ»-«Каббалкэнерго» биригиуню келечилери токну къаллай бир ойнагъанын айны 23-26 кюнлеринден кеч къалмай жиберирге эм  тёлеулени уа  онусуна дери этерге  кереклерин  эсге саладыла.