Устазланы хурметлерине - эсгертме

Устазны кюнюне аталып битеу Россейде, ол санда Къабарты-Малкъарда,  байрамла бардырылгъандыла.  Нальчикде уа устазгъа аталгъан эсгертме да ачылгъанды.

Эсгертме устазны иши жаланда окъутуу угъай, юйретиу да болгъанын ачыкъ кёргюзтеди: жашчыкъ педагогну къолундан тутуп турады, къызчыгъ а соруу бере тургъанча ишленнгенди. Кабинет бла чекленмейди устазланы иши, ала  сабийле бла кюн сайын ушакъла бардырадыла, аланы айныуларына ата-аналарындан аз къыйын салмайдыла.

Битеу Кавказда быллай эсгертмеле жамауат жаш тёлюню ёсдюргенлени къалай багъалагъанын кёргюзтеди. Сёз ючюн, Махачкъалада Каспий тенгизни боюнуда орус устазгъа эсгертме битеу да регионда бек кючлюледен эм ариуладан бирине саналады. Ол совет власть орнатылгъандан сора миллет республикалада, бийик тау элледе ишлеген оруслу устазлагъа аталгъанды. Къайсы заманлада да школлада керти да къарыуларын-кючлерин салып ишлегенле жигитлик этедиле, нек дегенде бу жумуш билимден сора да ниет тазалыкъны, кертичиликни, адамлыкъны излейди. Белгилисича, акъылбалыкъ болмагъан балачыкъланы окъурча-ишлерча, башларын кечиндирирча хазыр адамла этген алай тынч тюйюлдю.

Эсгертмени автору Аслан Оразаевды, аны макети эришиуде хорлагъанды.

Къабарты-Малкъарны Башчысы Казбек Коков аны ачылыуунда былай айтханды: «Бу скульптура композиягъа къарай, республикабызда жашагъанла, къонакъла да кеслерини устазларын эсгерликдиле, кеслери  сабийлени юйретиуге къаллай къыйын салгъанларыны юсюнден да сагъыш этерикдиле. Сёзсюз, хар бирибиз да бизни республикагъа тышындан келип, школлада ишлеп башлагъан биринчи устазланы да эсгеребиз бюгюн. Ала миллет интеллигенцияны ёсдюргендиле: поэтлени, жазыучуланы, суратчыланы эм артистлени, устазланы, спортчуланы, врачланы эм жамауат ишчилени, аскерчилени, производство къураучуланы».

 Кертиси бла да, устазлыкъ битеу миллетлени байлагъан ишди. Чынтты устазла кеслерине тынч жерни сайламайдыла, билимге итиннген сабийле къайда болсала да, анга жетедиле. Бек сыйлы ишни тамамлагъанлагъа жамауат сый-хурмет этеди, анга энтта да бир шагъатлыкъ – бу эсгертмеди.