Алгъа барыргъа, бийик муратлагъа итине

Османланы Олеся Тырныауузну бешинчи гимназиясында ингилиз тилден устазды. Нёгерлени аны юсюнден айта, ишине чыгъармачылыкъ кёзден къарагъанын, жууаплылыгъын,  салгъан муратына жетиуде итиниулюгюн белгилейдиле. Сабийлени окъутуп башлагъанлай, 2013 жылда ол «Россейде саулукъну устазы» деген эришиуню регион кезиуюнде экинчи жерни алгъанды. Бусагъатда да усталыгъын ёсдюргенлей, айныгъанлай турады.

- Мен Тырныауузда туугъанма, - дейди Олеся Борисовна. – Кесим да бешинчи гимназияда окъугъанма, терен билим химия-биология жаны бла алгъанлыкъгъа, ингилиз тилни билиуге аслам эс бёлгенме, аны биринчи дерследен окъуна жаратханма. Устазла кеслерин къалай жюрютгенлерине къачан да сейир этип къарагъанма, классда къангада ишлерге сюйгенме. Абадан класслада болгъанымда гитчелеге дерслени берирге ышаннгандыла, алай бла биринчи сынам алгъанма. Школну бошагъанда уа, экзаменледе орус тил бла математикадан сора да, сайлап, ингилиз тилни бергенме, «Американы Парламенти эм аны системасы» темагъа докладны къоруулагъанма. Бийик балла алгъанма, устазларым да  окъуууму андан ары филология жаны бла бардырырыма насийхат этгендиле. 

Алай бла гимназияны «бешлеге» бошап, ызы бла Къабарты-Малкъар къырал университетни Филология институтуну ингилиз тилден бёлюмюн жетишимли тауусханды, «Ингилиз тилден устаз» деген усталыкъны алгъанды. Урунуу жолун Терс-Къолну орта школунда башлагъанды, бир жылдан а аны туугъан шахарына ишлерге чакъыргъандыла. Мектепде, андан тышында да, Олеся Борисовна жигит адамды, бир тюрлю затха къатышса, айырмалыланы санына кирирге итинеди. Кеси заманында «Билим бериу учрежденияда коммуникация байламлыкъланы жюрютюуде гуманистика мурдор» деген халкъла аралы илму-практика конференцияны лауреаты болгъанды, «Жылны устазы» район конкурсда хорлагъанды. Дагъыда эки устаз бла «Чексиз дуния» республикалы фестивальны «Сахна сыфат» бёлюмюнде биринчи жерге чыкъгъанды.

Османланы Олесяны окъуучулары проект-излем иш бла тири кюрешедиле, ол а алагъа ингилиз тилден юйретиу программаны терен билирге, олимпиалада бла башха эришиуледе хорларгъа болушадыла. Аланы «British Bulldog» битеуроссей конкурсда бла «English Planet» жаш тёлю чемпионатда жетишимлери бардыла. Гимназистле «Филология школ» халкъла аралы проектге къатышхандыла, Финляндиягъа бла Швециягъа стажировкагъа баргъандыла.

Устаз сабийлеге билим бергенинден тышында, аланы ариу къылыкъгъа, адепге юйретирге да борчлуду.

- Юйретиуде, мен оюм этгенден, баш магъана тин-ниет жаны бла эм Ата журтха сюймекликге юйретиуге берирге тийишлиди, - дейди Османланы Олеся. – Акъылны аллында ала барсала, тюздю. Сабийлеге туугъан жерге кертичиликни сингдирирге, аны тарыхына, миллет тёрелеге хурмет эте билирге юйретирге, къыраллары, аны тин-ниет байлыкълары бла ёхтемлендирирге, жамауатха бла Ата журтларына къуллукъ эте билдирирге керекди. Бешинчи классдан башлап сабийлеге патриот сезимлени сингдирирге кюрешеме. Бюгюнлюкле аны магъанасы бютюн уллуду, алай эсе уа, баланы жюрегинде жерине сюймекликни къозгъауну дурус кёреме. Ол сюймеклик хар инсанда да барды, аны ючюн бизни борчубуз аны «уятыргъады». Журтунгу сюй, деп борч салыргъа жарамайды, ол сезим зорлукъну кючю бла жаратылмайды, анга юйретген этедиле. Бюгюнлюкде онунчу классны башчысыма, «Магъаналы ушагъыбыз» хар заманда да Россейни бла Къабарты-Малкъарны гимнлерине тынгылаудан башланады.

Гимназияда патриотизмге юйретиуню чегинде Украинада энчи аскер операциягъа къатышханлагъа болушлукъ акция къуралгъанды. Аны чегинде жыйылгъан ахчагъа, Окъуучуланы совети жылы кийимле, дарманла, резин сапохла, газ баллонла, татлы ашарыкъла эм башха керекле алгъанды, ала барысы да Элбрус райондан къуллукъ этген аскерчилеге жиберилгендиле. Аскерчилени араларында гимназияны выпускниклери, окъуучуларыны аталары да бардыла, ол санда Олеся Борисовна окъутхан Тебердиланы Джанбулат – лейтенант, мотострелковый ротаны командири, Кишикни орденини эки кере кавалери, эм къазауатха кеси ыразылыгъы бла кетген Алексей Родионов. Алгъаракълада Джанбулат мектебинде къонакъда да болгъанды, аны кёрюрге устазла, окъуучула да жыйылгъан эдиле.

Гимназияда юйретиу иш дагъыда кёп жаны бла тамамланады. Окъуучуланы советини оноуу бла, аны башчысы уа Олеся Борисовнаны окъуучусу Ёзденланы Назиляды, «Снежинка добра» деген жандауурлукъ акция бардырылады. Социал магъаналы иш устазланы, сабийлени, ата-аналаны бирикдиргенди. Жыйылгъан ахча къыйын ауругъан, багъалы реабилитация изленнген балаланы ата-аналарына бериледиле.

Гимназияда ишини юсюнден Олеся Борисовна Пятигорскда билим бериуню «Машук» арасында Шимал Кавказны билим бериу учрежденияларыны класс башчыларыны форумуну жетинчи сессиясында айтханды.  Ол «Абадан классланы окъуучуларында Ата журтха сюймеклик сезимни къурау» деген докладын къоруулагъанды. Бу форум Олеся Борисовнаны жюрегинде энчи ыз къойгъанды, окъутуу ишинде жангычылыкъла этерге кёллендиргенди. Алай эсе уа, жаш устаз бютюн сейир, магъаналы дерсле берликди, кесине жангы, бютюн бийик борчла салып, аланы толтурургъа итинирикди.