Багъалы чабакъланы кёбейтир умутда

РусГидро компанияны Къабарты-Малкъарда бёлюмюню специалистлери республиканы череклерине 470 минг каспий лосось чабакъчыкъ жибергендиле. Ары дери уа, быйыл жаз башында эмда жайда, суулагъа 650 минг чабакъчыкъ бошлагъандыла. Алгъын жыллада компания, Росрыболовствону СКФО-да бёлюмю бла бирге, кёллеге бла черекледе багъалы чабакъчыкъланы санын юч миллиондан артыкъгъа кёбейтгендиле.

Аланы къалайгъа жиберирге кереклисин билирча тинтиуле бардырадыла. Чабакъчыкъланы уа энчи заводда ёсдюредиле. Аны болжалы бир жыл чакълы болады. Бу затланы ауурлукълары 13-20 грамм тартып башлагъаны бла оруннга къуюп, машина бла жерине элтедиле. Компанияда айтханларына кёре, ол орун да бош аллай тюйюлдю, ичинде жылыуну, кислородну мардасын да бир чекде тутады.

Гидроэнергетикле экология жаны бла проектлеге дайым эс бурадыла. Компанияны ГЭС-лери ишлеген регионлада ала табийгъат байлыкъланы, кийик жаныуарланы, битим дунияны сакълау жумушлагъа къатышадыла эмда болушлукъ этедиле.

Быллай чабакъчыкъла жибериу тёре уа 2003 жылда Узакъдагъы Востокда чыкъгъанды. Ол заманда ишлене тургъан Бурейск ГЭС-ни кёлюне энергетикле 36 минг чабакъчыкъ бошлагъан эдиле. Артда уа бу тёрени башха бёлюмледе, ол санда Къабарты-Малкъарда да алгъандыла. Чабакъчыкъланы бир-эки угъай, къадар тюрлюлерин жибергендиле. Аланы санында Къызыл Китапха тюшгенле да бардыла.