Эсеплени кёргюзтгендиле

МЧС-ни КъМР-де Баш управлениясыны пресс-службасы билдиргеннге кёре, жууунуу кезиуню эсеплери биринчи октябрьде чыгъарылгъандыла. Жайда Къабарты-Малкъар республикада алты пляж бла тёрт къайыкъла бла катамаранла сюелген жерле тохташдырылгъан эдиле. Жуууннган жерлени норматив-праволу актланы жорукъларына кёре тинтгендиле. Сууда эм суу жагъалада аслам адамла жыйылып солугъан жерледе ишлеген къутхарыучула барысы да юрениулени ётюп, сезонлукъ къутхарыучу деген удостоверенияла къоллу болгъан эдиле.

Отчёт кезиуде республиканы суу объектлеринде тогъуз болум эсепленнгенди. Алада жети адам ёлгендиле. Ала барысы да жууунургъа эркин этилмеген жерледе суулагъа кирип, жарсыулу болгъанларын белгилерге тийишлиди.

РФ-ни МЧС-ини регион управлениясыны Адамланы суулада къоркъуусузлукъларын жалчытыу жаны бла бёлюмю жер-жерли самоуправление органланы къутхарыучулары бла бирге сезонда суу объектледе отуз тёрт тинтиу иш ётдюргендиле. Республиканы сууларында къайыкъланы бла катамаранланы къатышыулары бла авария болумла ачыкъланмагъандыла.

КъМР-ни суу объектлеринде къоркъуусузлукъну жалчытыу жаны бла июнь-август айлада   надзор ишле бардырылгъан эдиле. Жер-жерли самоуправленияны органларыны келечилери, къутхарыучула эм Ич ишле министерствону органлары бла бирге адамла солугъан эм жууунургъа жарамагъан жерледе тинтиу ишле бардырылып тургъандыла.

Билим бериу учреждениялада эм сабийни саулукъ кючлеу лагерьледе сууда хатасыз къалай жууунургъа керекли болгъаныны жорукъларыны юсюнден сабийлеге, анда ишлегенлеге да айтылгъанды. Къабарты-Малкъар республиканы суу объектлеринде адамла нек ёлгенлерин тохташдырыу жаны бла тийишли иш да бардырылгъанды. Анга тийишлиликде, сууда кесин жюрюте билиу кёпледе болмагъаны ачыкъланнганды. Адамла эркин этилмеген жерледе жууунадыла, иги жюзе билмегенлери эм кюч-къарыулары жетишмегени себепли уа къыйын болумлагъа тюшедиле. Бир-бир ата-анала да сабийлерине къарамагъанлары ол жарсыуланы туудургъан сылтауладан бириди.