Энергетикле эсгертиуле этгендиле

«Каббалкэнергону» специалистлери электрокюч къоркъуулу болгъаныны юсюнден адамлагъа эсгертиуле дайым этгенлей турадыла. Кёп болмай аны келечилери Котляровская элде аллай иш бардыргъандыла. Ала анда болгъанларыны сылтауу уа, компанияда айтханларына кёре, бир ненча юй, нек эсе да токсуз къалгъанлары эди.

Ары келгенлей, специалистле орам бла баргъан ток ызлагъа къарап, чыбыкълагъа абериле тагъылып тургъанларын эслегендиле. Ол тийреде жашагъанла айтханларына кёре, сабийле ойнай кетип, жип бла къысылгъан затланы ёрге атып, ызлагъа жетдиргендиле. Аны ючюн а эки чыбыкъ бир-бирине тийип, ток къыркъылгъанды.

Энергетикле аны жангыдан къошхандыла, ызы бла сабийлени ата-аналарына эсгертиуле этгендиле. Анда уа токга не аз да тийсе, ол бек уллу хата-палахха келтирирге боллугъун ангылатхандыла. Дагъыда чыпынлагъа ёрлерге, жерге тюшген темир чыбыкълагъа тиерге, ол тийреледе ойнаргъа, от этерге жарамагъанын туура этгендиле. Сабийлерине, кеслерине да сакъ болургъа, уллу кёллюлюк этмезге чакъырып, законодательство бла белгиленнген жууаплылыкъны да ангылатхандыла.