Жигит аскерчи жашыбыз бла ёхтемленебиз

Россейни Къорууланыу министерствосу бизни жерлешибизни жигитлигини юсюнден билдиреди. «Капитан Алим Темботов россейли аскер бёлюмлени тылдан хар кереклери бла да жалчытыр муратда, аскер къаугъала баргъан жерледе кёп кере болгъанды, душман тургъан тийрелеге жууукъдагъы районлада ишин бардыргъанды. Аллай кюнледен биринде ол башчылыкъ этген колонна аш-азыкъ эмда отлукъ бла россейли аскерле тургъан жерлеге бара туруп, украинлы диверсантладан онусуна тюбегенди. Алим Темботов, душман аяусуз от ачханына да къарамай, бир такъыйкъагъа да абызырамай, отлукъ бла машинала къоркъуусуз жерге чыгъарча эталгъанды, кеси да колоннаны составы бла бирге душман диверсантлагъа къажау от ачып башлагъанды. Атышыуну кезиуюнде ол аладан бешисин ёлтюргенди.

Къазауатны ахырында диверсантла барысы да жокъ этилген эдиле. Капитан Алим Темботовну батырлыгъы эмда тирилиги бла украинлы националистле россейли аскерле тургъан жерге колоннаны барыууна чырмау эталмагъандыла», - деп жазылады министерствону билдириуюнде.

Бизни аскерчи жашыбызны жигитлигини юсюнден окъуй, кёлюбюз кётюрюледи. Алим, къазауатха киришип,  къоркъуулу кезиуледе аскерчилерин ызындан тизерге боллукъ, боюнуна салыннган борчну жетишимли толтураллыкъ командирча хунерлигин кёргюзтгенди. Аны юйретген ата-ана сау болсунла.

Бюгюнлюкде Къабарты-Малкъардан жашла энчи аскер операцияда кеслерини борчларын бет жарыкълы толтурадыла. Аланы хар бири да жигитди, хар бири да бизни кёпмиллетли Ата журтубузну къоруулар ючюн кюн сайын да нацизмге къажау кюрешни бардырады Биз ала бла ёхтемленебиз!