Аскерчилени алгъышлагъандыла, къырал саугъала бергендиле

Къабарты-Малкъар Республиканы Башчысы Казбек Коков Прохладныйде орналгъан 31681 аскер частьны энчи борчланы толтургъан энчи бригадасы къуралгъанлы 10 жыл толгъанына жораланнган къууанчлы жыйылыугъа къатышханды. Казбек Коков бла частьны командири Сергей Подгурский энчи составны алгъышлагъандыла, аскерчилеге бийик къырал саугъала бергендиле, аланы бериуню юсюнден Указгъа Россей Федерацияны Президенти Владимир Путин къол салгъанды. Аскерчиле, кишиликлерин эм батырлыкъларын кёргюзтюп, энчи аскер операция бардырылгъан жерде борчларын толтургъандыла.

«Къабарты-Малкъарда жашагъанлагъа, манга да быллай бёлюм бизни республиканы тийресинде орналгъаны бек даражалыды. Бригадада бизни жерлешлерибиз, битеу Россейден жашла да борчларын толтурадыла. Бюгюнлюкде ала магъаналы ишни бардырадыла – къокъуусузлукъну эм къыралыбызны тамблагъы кюнюн, Донбассны мамыр адамларыны жашауларын сакълайдыла. Битеу аскерчилерибизге харкюнлюк жигитлери эм Ата журтха къуллукъ этгенлери ючюн ыразылыкъ сёзле айтыргъа излейме», - дегенди Казбек Коков энчи составха айланып сёлешген кезиуюнде.

«Бизни бригада бу он жылгъа ёсгенди, кюч алгъанды, аягъы юсюне болгъанды эм тюрлю-тюрлю ишледе кесини магъаналылыгъын кёргюзтеди: аскер хазырлыкъда, энчи аскер операцияда. Анда бизни тенглерибиз аскер борчларын сыйлары-намыслары бла толтурадыла», - дегенди полковник Сергей Подгурский. Жыйылгъанла Ата журтларын къоруулай жан берген аскерчи тенглерин бир минут шош сюелип хурметлегендиле.

Казбек Коков частьны командири бла бусагъатда ишчи борч бла командировкада болгъан аскерчилеге болушлукъ этиу сорууланы да сюзгендиле. Алгъынча, излемлеге кёре, келлик ыйыкъда аскерчилеге керекли затла, ол санда биринчи изленнгенле эм медикаментле да жиберилликдиле.