Элбрусха табийгъат газ келген кюн

КъМР-ни 100-жыллыгъына

Бу суратла  2001 жылда  Элбрус районну  Элбрус  элинде  алыннгандыла. Андан бери  жыйырма  бла бир жыл озгъанды. Узакъ тау элде жашагъанла ол къууанчлы кюнлерин бюгюн да унутмайдыла. Ол кюн элге  кёксюл «жаннет»  келген эди. Газ Элбрус элге жетгенини къууанчын белгилерге ары республиканы ол замандагъы Президенти Валерий Коков, КъМР-ни Правительствосуну Председатели Чеченланы Хусейин, республиканы министерстволарыны, ведомстволарыны башчылары, Элбрус районну администрациясыны оноучулары, «Межрегионгазны» генеральный директоруну орунбасары Сергей  Шибанов, дагъыда кёп башхала да келген эдиле. Элге кирген жерге дери газ келгенине элбрусчуланы  жашы, къарты да бек  къууаннгандыла.

Ол кюн республиканы Президенти Валерий Мухамедович  Гирхожан сууну юсю бла ишленнген жангы кёпюрге, черекни боюнунда плотиналагъа, шахарда ырхы  келтирген палахланы кетериу жаны бла бу кюнлеге не зат этилгенине да айланып къарагъан эди.

Сагъат тёрт бола уа, башда айтханымча, Президентни, Правительствону Председателин, башха оноучу къуллукъчуланы, къонакъланы да элбрусчула сакълай эдиле. Омакъ кийиннген къызчыкъла къонакълагъа гюлле, къолларында газны жаннганын кёргюзтген суратла бла тюбегендиле. Къонакъла эм къонакъбайла бир бирлери бла жарыкъ саламлашханларындан сора къууанчлы жыйылыу башланады. Аны районну администрациясыны ол замандагъы башчысы Геккиланы Заур ачады.

-  Бюгюн районда уллу байрамды. Шёндюлеге республикабыз саулай да кёп къалмай, газ  бла жалчытылгъанды деп, таукел  айтыргъа боллукъбуз. Узакъ тау эллеге газ келир деп, кимни эсинде бар  эди, ол а, кесигиз кёргенликден, болгъан ишди. Аны элге келгенине республиканы оноучулары, «Межрегионгаз», дагъыда кёп башхала себеплик этгендиле,- дегенди ол.

Элбрусчуланы республиканы Президенти В.М.Коков да алгъышлагъанды.

-Эллеге газ  тартыу быйыл бошаллыкъды. Бызынгыгъа, Огъары Малкъаргъа газ тартыр амал болмагъаны себепли, ала электрокюч бла жалчытылынырыкъдыла. Элледе жашагъанла кёмюрню, отунну, сыгынны къоюп, тынчлыкълы жашау этерикдиле, халкъны культурасы, жашау болумлары да игиленирикдиле. Алайды да, мен кесими, республиканы Правительствосуну, Парламентини атындан сизни бюгюннгю байрам бла алгъышлайма. Огъурлу кюнде келсин газ! Сизге бу  къууанчны келтирир ючюн Магомет Магушковну башчылыгъында къурулушчула жылны узунуна къарды, жауунду, къызыуду, сууукъду  деп къарамай, ишлегендиле, Магометни бетинде мен къурулушчулагъа да ыспас  сёзюмю, жюрек  ыразылыгъымы  айтыргъа сюеме - дегенди Къабарты-Малкъарны оноучусу.

Президент  Элбрус элни  администрациясыны башчысы Сотталаны Индирагъа да кесини ыспас, бюсюреу сёзюн айтханды эмда  аны бла бирге ол элни администрациясыны башчысына жангы «Нива» машинаны ачхычларын да бергенди. Андан сора да, Валерий Мухамедович элде  къолайсыз жашагъан, кёп сабийли юйюрлеге газ тартыргъа болушлукъгъа ахча бергенди.

Элбрусчуланы газ келгени бла Сергей Григорьевич  Шибанов да алгъышлагъанды. «Кавказны жаухары – Минги тауну тийреси жашнаргъа эмда жашаргъа, бютюн айбат эм тап болургъа керекди, аны себепли, биз мындан ары да болушурукъбуз сизни республикагъа, ол а Президентигизни хайырынданды»,- дегенди ол.

Эллилени атындан Президентге, «Регионгазны» башчыларына, къурулушчулагъа да элли къарт Хапаланы  Юсюп ыспас этгенди. «КъМР-ни  ол замандагъы ич ишле министри Х.А. Шогенов а Элбрус элни администрациясыны башчысына саугъагъа  тюрсюнлю телевизор  бергенди. «Биз, ич ишледе къуллукъ этгенле, былайда тынчлыкълы жашау болур ючюн,  бир затны да аярыкъ тюйюлбюз»,- деп къошханды ол.

Элбрус элге келген газны республиканы Президенти В.М. Коков жандыргъанды. Жарыкъ  макъамла  эшитиледиле, жыйылгъанла къарсла къагъадыла, къызчыкъла бла жашчыкъла уа миллет тепсеулени  тепсейдиле.  Алайда ол кюн къууанчны чеги жокъ эди .

                                    х х х

Элбрус элде газ быргъыны  ача,  республиканы биринчи Президенти В.М. Коков, Бызынгыда эмда Огъары Малкъарда уа  эллиле электрокюч бла  хайырланырыкъдыла, деген эди. Болсада, аны тири къармашыуу бла  бир кесекден  кёксюл  от ол элледе,  узакъ тау эл Булунгуда да жаннганды.  Бюгюнлюкде Россейни бир къауум ёзен регионларында окъуна газ болмагъан жерле тюбейдиле, бизни республикада уа аллай  бир эл да жокъду.

  Суратда: В.М.Коков  газны жандыргъан кезиу.