Келгенлеге тынгылагъанды, тийишли буйрукъла бергенди

КъМР-ни Башчысы Казбек Коков республиканы инсанларыны къаууму бла ыйыкъ сайын бардырыучу тюбешиуюн ётдюргенди. Бу жол анга  Прохладна районда «Водник - Ново-Покровский» автобус маршрутну жангыдан ачылырына себеплик этерин тилеп келгенле да бар эдиле.  Республиканы оноучусуна билдирилгенича, ол маршрут бюгюнлюкде 1100 адам жашагъан Ново-Покровский хуторну социал магъаналы объектлерини къатлары бла озады. Казбек Коков алайда окъуна тийишли министерствогъа муниципалитет бла бирге ол жумушха къараргъа эмда керекли мадарла этерге буюргъанды.

Нальчикде жашагъан бир тиширыу уа шахарда Пугачёв атлы орам бек осал халда болгъанын, ол жангыртылмай тургъанлы 30 жылдан артыкъ болгъанын  билдиргенди эмда анга бир асфальт салынса эди, деп тилегенди. «Аны жол ишлени планына къошарбыз», - деп ышандыргъанды Казбек Коков.
Мальбахов орамда жашагъанла уа аланы кёп фатарлы юйлерине тынгылы ремонт этилмей жарамазлыгъын айтхандыла. Ала билдиргеннге кёре, ол республикалы адрес программагъа къошулупду эмда аны жангыртыр кезиу  2026 жылда жетерикди. Болсада юйню башы асыры тозурагъандан, анда жашагъанла анга ремонт алгъаракъ этилип башланырын тилегендиле.

Казбек Коков дагъыда къыйын жашау болумгъа тюшген къолайсыз юйюрлени тилеклерине да  тынгылагъанды, керекли оноула да этгенди.

Ол кюн  приёмгъа  келген инсанланы битеу тилеклерине бла тарыгъыуларына эс буруп, КъМР-ни Башчысы тийишли ведомстволаны башчыларына буйрукъла бергенди. «Ала къалай толтурлукъларына кесим контроль этерикме»,-дегенди  регионну оноучусу кесини телеграм-каналында.

                            

 

 

Юсюпланы Галина хазырлагъанды.
Поделиться: