Жигитликлерине баш ургъандыла

«Хорламны бетлери. Жигитликни летописи» акцияны чеклеринде Росгвардияны ведомстводан тышында къалауурлары Уллу Ата журт урушну ветеранлары Василий Дегтяренкода бла Дмитрий Мироненкода къонакъда болгъандыла. Аскерчиле алагъа къазауатны жылларында батырлыкълары, Хорламны жууукълашдырыуда къыйынлары ючюн ыразылыкъларын айтхандыла.

- Сизни жигитлигигиз Къабарты-Малкъарны халкъына Ата журтубузгъа къуллукъ этиуню юлгюсюдю. Бюгюнлюкде ол къазауатны юсюнден хапарларыгъыз бла ёсюп келген тёлюню юйретиуге къошумчулукъ этесиз, алагъа къыралыбызны тарыхыны юсюнден тюз  билдиресиз. Аны ючюн сизге баш урабыз,-дегенди полицияны майору Асият Хачетлова Василий Дегтяренкогъа эмда сыйлы ветераннга саулукъ, узакъ ёмюр тежегенди.

Василий Дегтяренко урушха 17-жыллыкъ жаш болуп тюшгенди. Мараучуланы къауумунда къуллукъ этгенди, ызы бла Запад Украинада танк бригадада механик болгъанды, Варшаваны эркин этиу къазауатха къатышханды. Хорлам сермешле бла Берлиннге дери жетгенди.

 Дмитрий Мироненкону уа полицияны полковниги   Заур Кяров   алгъышлагъанды эмда анга эсде къаллыкъ саугъа бергенди.  Ветеран аскерчилеге ыспас этгенди эмда уруш жыллада фронтда къазауатны юсюнден хапар айтханды. Ол майдалладан бла орденледен эсе   мамыр жашау уллу саугъа болгъанын чертгенди.

 Дмитрий Мироненко да фронтха 17 жылында тюшгенди. Нальчикни къоруулау сермешлеге къатышханды, Ставропольда къазауатда жаралы болгъанды. Махачкъалада кесине бакъдырып, Персия богъазгъа   къуллукъ этерге ашырылгъанды. СССР-ге  болушхан къыралладан ауур жюкле былайтын келтирилгендиле. Хорламгъа ол Иранда тюбегенди, Къызыл Байракъны ордени,  «Кавказны къоруулагъаны ючюн», «Уллу Ата журт урушда Германияны хорлагъаны ючюн» майдалла бла саугъаланнганды.

 

Тикаланы Фатима хазырлагъанды.
Поделиться: