Пандемия чеклениулени кезиуюнде къырал себепликлени жаны бла эм иги регионланы санында

Къабарты-Малкъар Республиканы Башчысы Казбек Коков КъМР-ни Предпринимательлерини эркинликлери жаны бла уполномоченный Юрий Афасижев бла ишчи тюбешиу къурагъанды. Ала 2021 жылда тамамланнган ишлени эсеплерине эм келлик заманда планлагъа къарагъандыла.

- 2021 жылда Къабарты-Малкъарда гитче эм орта предпринимательствону субъектлерини саны 7 процентге ёсюп, 2022 жылны аллына 19 мингден артыкъ предприятие эм энчи предприниматель болгъандыла. Ол кёрюмдюле Россейни Федерал налог службасыны Бирлешген реестриндендиле. Бизнес бёлюмде 59 мингден артыкъ адам ишлерин бардырадыла, алты бизнес-инкубатор ишлейди, алада МСП-ны 72 субъекти орналыпды эм 269 урунуу жер къуралыпды, - деп билдиргенди регионну Башчысына Юрий Афасижев.

Гитче эм орта бизнесге билеклик этиуню чеклеринде, дагъыда республикада тийишли инвестиция болумну къурар ючюн бир ненча регион проект бардырылады: «Кеслери иш жарашдыргъан инсанланы урунууларына ахшы болумла къурау», «Бизнесни женгил башларча эм тап бардырырча болумланы къурау», «Гитче эм орта предпринимательствону субъектлерини терк айныулары». Жангы коронавирус жукъгъан аурууну жайылгъан болумларында болушлукъ этиу регион халлы амаллагъа эс бурулады, гитче эм орта бизнесни плановый тинтиулерине мораторий салыннганды.

Къабарты-Малкъар Республика биринчи чеклениулени кезиуюнде тюрлю-тюрлю къырал себеплик онгланы санлары эм магъаналылыкълары бла 15 эм иги регионну санына къошулгъанды. Ол регион экономиканы тохташыулугъун терклендирирге болушханды. Андан сора да, РФ-ни Президентинде Предпринимательлени эркинликлери жаны бла уполномоченныйни институтуну тинтиулерине кёре республика эпидемиология кёрюмдюле игиленнгенден сора МСП-ла ишлерин жангыдан башлагъанда ачыкъ эм магъаналы стратегиялы регионланы санындады.

2021 жылда заран жетген бёлюмлеге болушлукъ амалланы чеклеринде федерал льгота кредит программаны 43 предприятие хайырланнганды, ала битеу да бирге 114 миллион сомдан аслам льгота кредитле алгъандыла. Аланы жартысындан кёбюсю асламлагъа аш-азыкъ ашатхан предприятияладыла.

Тюбешиуде Къабарты-Малкъарда гитче эм орта бизнесге регион билеклик этиу онгла эм шёндюгюлю тыш санкцияла басынчакълыкъланы кезиулеринде тийишли инвестиция болумланы мындан арысында къуралыуларыны соруулары сюзюлгендиле.