Поликлиниканы къурулуш ишлерине эс бурулгъанды

Къабарты-Малкъар Республиканы Башчысы Казбек Коков Нальчикде 1-чи номерли поликлиниканы къурулушуну бардырылыууна къарагъанды.  Жангы мекям 1-чи номерли шахар клиника больницаны тийресинде ишленеди.

Эсигизге салайыкъ, проектни жашауду бардырыу соруу Россейни Президенти Владимир Путинни саулукъ сакълауну биринчи звеносуну ишин игилендириуге бурулгъан буйрукъларыны чеклеринде федерал даражада сюзюлгенди.

«Бу проектни кийирирге Россейни Правительствосу бла бирге хазырланнганбыз эм аны юсюнден 2021 жылда билдиргенбиз», – дегенди Казбек Коков кесини телеграм-каналында.
Бир жолгъа 500 адам келирге боллукъ эм кенглиги 8 минг квадрат метрли поликлиника Къабарты-Малкъарда эм уллу боллукъду. Къурулуш ишле быйыл мартда башланнгандыла. Тозурагъан больница мекямла кетерилгендиле, этажлада отоулагъа къаралады, мекямны халы эм тыш кёрюмдюсю белгиленнгендиле. Къурулуш майданны тийресинде жер ишле тамамланып бошалгъандыла, топуракъ алышындырылгъанды. Мекямны фундаментин салырча, мурдорну жарашдыра турадыла.

Жангы поликлиникада, ол а битеу «аяулу технологияланы» жорукъларына келиширикди, картохранилищеси бла регистратура, терапевт бёлюм, терк болушлукъ тапдыргъан служба, медицина специалистлени отоулары, медицина профилактиканы бёлюмлери, медик студентлеге окъутуу классла бла аудиторияла, процедура эм прививка отоула, смотровойла, кюндюзгю стационар, административ-мюлк бёлюмле къураллыкъдыла.  Медицина махкемени кючлю лаборатория-диагностика мурдору, эндоскопияны эм медицина реабилитацияны шёндюгю бёлюмлери, амбулатор онкология болушлукъну арасы да боллукъдула. Объектни къурулушу 2023 жылны ахырына тындырыллыкъды.

Къабарты-Малкъар Республиканы Башчысы Казбек Коков къурулуш бардырылгъан майданнга къарагъанды, ызы бла ишлене тургъан объект бла байламлы къауум буйрукъла бергенди эм жууаплы адамланы жанындан бардырылгъан ишлени качестволарына эс бурууну магъаналылыгъын чертгенди.

Андан сора да, 1-чи номерли ГКБ больницалы шахарчыкъны къалгъан жартысы жууукъ заманда тапландырыллыкъды. Хайырланыудан чыгъарылгъан тозурагъан мекямланы кетерирге эм тийрени игилендирирге мурат этилинеди.