«Баш борчубуз – оюла тургъан юйлени азайтыуду»

Бу кюнледе "Жер-жерлени айнытыуну фонду" жамауат компанияны попечительлерини советини башчысы Сергей Степашин эм компанияны башчысы Константин Цицин Къабарты-Малкъаргъа ишчи жумуш бла келген эдиле. Ала КъМР-ни Башчысы Казбек Коков бла бирге Майский шахарда оюлургъа къоркъуулу юйледен кёчюрюлгенлеге жангы фатарладан ачхычланы бергендиле.  

Бу къууанчлы ишден сора Сергей Вадимович бла Казбек Валерьевич журналистлени сорууларына жууаплагъан эдиле.  

Сергей Степашин, биринчиден, республикада кёп кере болгъанын, КъМР-ни биринчи президенти Валерий Коков бла шуёхлукъ жюрютгенин айтханды. «Жер-жерлени айнытыуну фонду»  жамауат компаниягъа жангы жууаплылыкъла берилгенлерини юслеринден да билдиргенди. Ол санда кёп къатлы юйню къурулушуна юлюшюн къошуп, алай мекям битдирилмей, фатарсыз, ахчасыз да къалгъанланы эркинликлерин къоруулау жумушла къошулгъандыла. Ол республикада бу жаны бла кемчиликле болмагъанларын иги шартха санагъанды.

Андан сора да, жашау журт-коммунал мюлкню жангыртыу жумушланы да тамамларыкъды компания. «Законлагъа тюзетиуле хазырлана турадыла. Алагъа кёре уа фондха кёп къатлы юйлени тынгылы жангыртыу къалай бардырылгъанын тинтиу бла бирге бу ишге контрольну тамамларгъа эркинлик да берилгенди. Бу жаны бла къыралда кемчиликле кёпдюле. Алай баш борчубуз а адамланы осал, оюла тургъан юйледен кёчюрюудю. Бизге келир тёрт жылны ичинде къыралда миллион адамны жашау болумларын игилендирирге керекди. Россейни башчысы Владимир Путин программаны тохтатмай, жашауда андан ары бардырыргъа буйрукъ бергенди, анга ахча да бёлюнюрюкдю. Ол санда Къабарты-Малкъарда оюлургъа къоркъуулу юйледен 1,8 минг адамны кёчюрюрге керекди энтта. Шёндю уа жангы программа хазырлана турады, аны толтураллыгъыбызгъа ахырда ишексизме», - дегенди ол.

Сергей Степашин Къабарты-Малкъарда къурулуш иги айныгъанын, республиканы оноучулары бу жумушлагъа энчи эс бургъанларын да чертгенди. Ол ахчаны аяп турмай, аны регионлада къурулушлагъа къоратыуну тюзлюгюн да чертгенди.

Казбек Коковдан а шахарланы бла эллени суу бла жалчытыуну юсюнден соргъандыла. Ол «Миллет къолайлыкъны фондундан» ахча бёлюннгенин эсге алып, аны жер-жерлени суу бла жалчытыу жумушлагъа къоратыргъа оноу этилгенин билдиргенди. «Бизге 260 миллион сом бёлюннгенди. Къаллай объектле ишлетилликлерин айтхан алыкъа эрттеди, шёндю заявкала хазырланадыла», - дегенди ол.