Патриот сезимлени ёсдюрген эришиуле

Бу кюнледе Нарткъала шахарда Т.Х. Эркенов атлы спорткомплексде аскер къол тюйюшден 115-чи атлы-аскер дивизияны эсгериу кюнюне аталгъан айырмалы турнир бардырылгъанды. Ол 10-18 жыллары толгъан жаш спортчуланы араларында ётгенди. Ары Къабарты-Малкъар Республиканы онбеш районундан 220-дан аслам спортчу къатышханды.

Турнирни аллында парадха  командала 115-чи атлы-аскер дивизияны эм 316-чы Урвань Кавалерия полкну байракълары бла чыкъгъандыла.

– Сизни арагъызда аппалары урушха къатышмагъан бир тукъум жокъду. Ата-бабаларыгъызгъа тийишли тёлюсюз, къадалып жарау этгенигиз, эришиуледе ётгюрлюгюгюз бла бизни жерибизде батырлылыкъ бюгюн да болгъанын кёргюзтесиз, - деп спортчуланы КъМР-ни Къол тюйюш федерациясыны таматасы Черкесланы Заурбек алгъышлагъанды.

Сермешде биринчи жерни кеслерини жыл сан къауумунда Азамат Безиров, Кантемир Теунов, Имран Калмыков, Тамерлан Малухов, Салим Шогенов, Алан Малухов, Кантемир Шорданов, Ренат Исаев, Кантемир Керефов эм башхала алгъандыла.

Экинчи жерлеге Мухадин Безиров, Расим Клишев, Анзор Куашев, Дамир Хужоков, Абисал Тхакахов, Азрет Битохов, дагъыда талай спортчу тийишли болгъандыла.

Ючюнчю жерлеге чыкъгъан къауумунда Алийланы Мусса, Астемир Шугушхов, Ислам Чилов, Джамбулат Шекихачев, Абдур-Рахман Шакуа болгъандыла.

Бу эришиуде усталыкъларын кёргюзтгенле Россейни биринчилигине къатышырыкъдыла. Ол а апрельде Москва областьда Краснознаменск шахарда ётерикди. Хасан бла Алим Урусовла уа Невинномысскде аскер къол тюйюшден эр кишилени араларында бардырыллыкъ Россейни кубогуна къатышырыкъдыла.

Спортчула тренерле Анзор Тхашигоевде, Казбек Шомаховда, Альберт Шереужевде эм башхалада жарау этедиле. Алчылагъа кубокла, майдалла, грамотала эм багъалы саугъала берилгендиле.