Коронавирусдан багъаргъа 26 миллион сом бёлюннгенди

Къабарты-Малкъар Республикагъа амбулатория болумлада коронавирус инфекциядан ауругъанлагъа  дарманла сатып алыргъа 26 миллион сом бёлюннгенди. Саусузланы врачланы къараулары бла багъарыкъдыла.

Алгъаракъда КъМР-ни Башчысы Казбек Коков республиканы правительствосуна амбулатория амал бла медицина болушлукъ алгъанланы   дарманла бла жалчытыргъа керекди деп буюруу берген эди.   Шёндю республикалы бюджетни юсю бла 32 миллион сом багъасы керекли дарманла  сатылынып алыннгандыла.  

Битеу да регионлагъа амбулатория халда медицина болушлукъ алгъанлагъа 5 миллиард сом бёленнгенди деп айтылады РФ-ни Правительствосуну сайтында.   

 Андан сора да, РФ-ни Правительствосу къыстырыкъ фондундан больницалада жатханланы багъаргъа деп  Россейде эсепде болмагъан дарманланы сатып алыргъа 15 миллиард сом бёлгенди. Сёз, бек аздан 200 минг упаковка молнупиравира эм 78 456 упаковка тиксагевимаба  бла цилгавимаба къыт дарманланы сатып алыуну юсюнден барады. Тизмеге  дагъыда 3,1 минг флакон сотровимаба эм 515 минг упаковка ремдесивира дарманла киредиле.

 Сагъынылгъан препаратланы сатып алыу бла Россейни саулукъ сакълау министерствосуну бойсунууунда болгъан Адамланы дарманла бла жалчытыуну къурау эм план ишни бардырыу федерал ара кюреширикди. Андан сора дарманла регион больницалагъа эм федерал медицина биригиулеге юлешинирикдиле.

Тийишли буйрукъланы проектлери  озгъан ыйыкъда РФ-ни Правительствосуну жыйылыуунда къаралагъандыла эм къабыл этилгендиле.   

Ырысхыланы къыстырыкъ фонддан бёлюуню  юсюнден соруу 18 январьда  Коронавирус инфекциягъа къажаугъа жораланнган координация советни  кенгертилген халда бардырылгъан жыйылуунда къаралгъанды, деп билдиредиле республиканы оноучусуну пресс-службасындан.

Бизни корр.

 

 

Поделиться: