Черек райондан хапарла

Герпегежчиле бла тюбешгенди

Черек районну администрациясыны башчысы Къулбайланы Алан  Герпегежге баргъанды. Аны биргесине ары дагъыда район администрацияны башчысыны орунбасары  Башийланы Рамазан, районну  администрацияны башчысыны орунбасарыны къуллугъун толтура тургъан  Альберт Харсиев да баргъандыла. Район башчы  Герпегеж элни администрациясыны башчысы  Гузеланы Ибрагим, мектепни директору  Бёзюланы Хусей, элни иймамы  Бёзюланы Хаким, бюджетде ишлегенле, элни жамауат жашаууна тири къатышханла да  орта школну жыйылыула бардырылыучу залында тюбешгенди.

Аны кезиуюнде эллиле район башчыдан  мектепде медицина билими болгъан специалист ишлерин,  орамлада чыракъла жанарча, жоллагъа ремонт этилирин, фельдшер -акушер пункт эмда эллилеге Маданият юй  ишленирин тилегендиле. Район  администрацияны башчысы  тилеклени, предложенияланы барына да тынгылап, аланы хар бири бла байламлы ишни болумун ангылатып айтханды, жаратылгъан чырмауланы кетериуню жолларын излериклерин да эсге салгъанды.

- Бюгюнлюкде биз болжалгъа салмай тамамланылыргъа керекли ишлени белгилегенбиз. Сёзсюз, хар иш да бусагъатлай тамамланылып къалаллыкъ тюйюлдю, белгиленнген затланы барын да  жер-жерли самоуправление органла бла бирге тамамларгъа керек боллукъду. Эллилени хар бири да, кесин бир жанына тюртдюм этмей,  жашауну бютюн игилендирирча мадарланы этерге бурулургъа  керекди. Жаланда биригип, болгъан жумушланы бирге къолгъа алсакъ, ма ол заманда  битеу чырмауланы да тамамларгъа боллукъбуз,-деп чертгенди Алан Борисович.

Андан сора да,  мектепни жыйылыула бардырылыучу залына къарап чыкъгъандыла, анга тынгылы ремонт этер ючюн ахча излерге кереклисин да белгилегендиле жыйылгъанла.

Тюбешиуге къатышхан герпегежчиле район башчы алагъа келип, жарсыуларына кёз-къулакъ болгъаны, алай бла жашауларын игилендирирге къайгъыргъаны ючюн  ыспас этгендиле.

Адамлагъа бек керекли махкеме

Жер-жерли администрацияны башчысы  Къулбайланы Алан  Огъары Малкъар элде участка больницаны иши бла шагъырейленнгенди.

Тёрт  мингден аслам адам жашагъан элде  медицина болушлукъну  терапевт,  сабий         доктор, тиш доктор,  тиширыулагъа къарагъан врач эмда битеулю практикалы врач бередиле.

Больницаны мекямы  1986 жылда  хайырланылыргъа берилген эди. Жыл сайын анга ремонтну больницада ишлегенле кеслери этип тургъандыла, энди уа анга тынгылы ремонт керек болгъанды.

Капитал ремонт этер ючюн деп проект-смета документация хазырлана турады. Ол "Модернизация первичного звена здравоохранения" деген  регион  программагъа тийишлиликде бардырыллыкъды.

Мекямны хар жерине да кирип къарап, баш врач  Чаналаны Аслижан бла да ушакъ этип, Алан Борисович коллектив ишин тынгылы тамамлагъанын белгилеп эмда  ала этген жумуш эллилеге бек керек болгъанын чертгенди.

Эллени башчылары бла тюбешгенди

Черек районну администрациясыны башчысы Къулбайланы Алан  орунбасары Альберт Харсинов бла бирге ишчи жумуш бла районну бир къауум эллерине барып, анда болумгъа къарагъандыла.

Жемталада  Маданият юйню болумуна къарагъандыла. Анга  быйыл  КъМР-ни Культура министерствосу бёлген  ахчагъа  ремонт этилликди. Терезелери, эшиклери алышындырыллыкъдыла, сюртюллюк, бояллыкъ жерлерине да къол жетерикди, дагъыда Маданият юй кеси кесин жылытырча мадарлагъа кёчерикди.

Зарагижде уа  эл башчы Хусен Шереужев бла тюбешип ушакъ этгендиле, къабырлагъа элтген жолну халине къарагъандыла. Алай бла 2023 жылны  Къырал программасына кийирир ючюн деп,  проект-смета документация жарашдырыргъа кереклисине келишгендиле.

Аушигер элде уа аны башчысы Аслан Дзамихов бла  тюбешгендиле. Аны бла бирге элде айланып кемчиликлеге эс бургъандыла, Бицуев орамда  суу баргъан ызла юзюлген жерлени да  кёргендиле эмда  тюбеген кемчиликлени кетериуню жолларын белгилегендиле.

Жууукъ заманда  эл башчы,  кем жерлени кетериу жаны бла "Черексервис"  муниципал управление бла  келишип, жумушла тамамларыкъды.

Битеу кемчиликле тамамланырыкъдыла. Ала  район башчыны энчи контролунда боллукъдула.

Сабийле  не жаны бла да бютюн  иги айнырча

"Билим бериу"  деген  миллет проектни "Шёндюгю школ" деген  регион проектине  тийишлиликде  Огъары  Малкъарны 1-чи номерли мектебинде  эмда  Огъары Жемталаны  1-чи номерли окъуу юйюнде  "Точка роста" деген  илму эм  технология жаны бла  билим бериу арала ачылгъандыла. 

Аланы  къууанчлы халда ачыугъа жер-жерли администрацияны  башчысыны орунбасары Тэреза Эфендиева, районда  билим бериу эмда жаш тёлю политика управленияны  башчысы  Бёзюланы Ахмат, окъуу юйлени устазлары, школчулары да къатышхандыла.

Чакъырылгъан къонакъла  ол магъаналы иш бла алгъышлап, илмуда, чыгъармачылыкъ ишде да ала жетишимли болурларын сюйгенлерин билдиргендиле.

Аралада  тёртюшер кабинетле бардыла. Ала  физикадан, химиядан, биологиядан эмда робототехникадандыла. Ала бары да  школ эмда школдан тышында ишге деп жарашдырылгъандыла, шёндюгю излемлеге тийишли приборлары, башха кереклери  бла да жалчытылыныпдыла.

Огъары Малкъар элни мектебини директору  Таукенланы Аслан  алада аллай аламат ара ачханлары ючюн  ыразылыгъын билдиргенди эмда ол сабийлени  кёп жаны бла билимлерин ёсдюрюрге себеплик этеригине  ышаннганын да айтханды.

Андан сора уа, къызыл лентаны да кесип, кабинетлеге киргендиле. Къонакъла анда болгъан хар затха да эс буруп къарагъандыла. "Точка ростада" билим алгъан жашла бла къызла да кёп жаны бла усталыкъларын кёргюзтгендиле.  

Жоллагъа, суу баргъан ызлагъа да эс буруллукъду

Огъары Жемтала элни башчысы  Оракъланы Арсенни башламчылыгъы бла  эл ичинде жолланы тапландырыу ишле бардырыладыла. Алай бла  анда эки километрден артыкъ жол тап халгъа келтириледи. Андан сора да,  эллиле юч минг метр чакълы  суу баргъан ызланы боюнларын тазалагъандыла, бир-бир орамлада уа  суу баргъан ызлагъа ремонт этиле турады.    Черекчиклени юсю бла машина  чырмаусуз барырча  асбестр быргъыла орнатыладыла, бу кюннге  орамлада жанмагъан  70 чыракъ жандырылгъанды эмда жарытырча жыйырма прибор орнатылгъанды.

Элни бюджетинде жолланы тапландырыргъа деп ахча бёлюннген эди. Болсада ол жетишмегенди. Алай, депутат корпусну эмда тири эллилени хайырындан  ишле бары да тамамланылгъандыла.

Бу кюннге  сабий садны  ремонтуна, Маданият юйню ишлерге эмда эски болгъан суу баргъан ызланы алышындырыргъа деп,  проект-смета документле хазырланыла турадыла.

Маданиятны жангы от жагъасы

Огъары Малкъар элде шёндюгю излемлеге  келишген эмда иги кесек замандан бери сакъланнган Маданият юйню эшиклери капитал ремонтдан сора ачылгъандыла. Мекямгъа "Эл жерлени комплекс халда айнытыу" деген къырал программагъа тийишлиликде  КъМР-ни Башчысы Казбек Коковну  себеплиги бла  ремонт этилгенди. Аны къууанчлы халда ачылыууна къатышыргъа  кёпле келгендиле. Аланы араларында   КъМР-ни Жарыкъландырыу, илму эмда жаш тёлюню ишлери жаны бла  министерствону бёлюмюню таматасы Марина  Мизова, жер-жерли администрацияны башчысыны     орунбасары  Тереза Эфендиева да бар эдиле. Район башчыны атындан эллилени Тереза Эфендиева алгъышлагъанды. Аны бла бирге  Маданият араны жангыртыугъа юлюшлерин къошханлагъа да ыспас этгенди. "Районда дагъыда бир  Маданият ара ачылгъанды. Ол эллилеге, ёсюп келген тёлюню ниет, къылыкъ жаны бла юйретиуге къуллукъ этерикди. Ариу адетлерибизни бла тёрелерибизни сакъларгъа да себеплик боллукъду. Мында сабий чыгъармачылыкъны  юйю ишлерикди, жыр, "Поэзияны сюйгенлени" клубу , къыл къобузда согъаргъа юйретиу да боллукъдула. "Къууанч" эмда "Аламат" халкъ ансамбльле, "Таулула" халкъ ансамбль да репетицияларын бардырлыкъдыла, сабийлеге эмда абаданлагъа деп библиотека ишлерикди, спорт залда уа жараула башланырыкъдыла.

 Андан сора  чекленнген жууаплылыгъы болгъан "Къабмалкъремстройсервис"  подряд организацияны ишчилерине, Маданият юйню  ремонтун тынгылы бардыргъанлары ючюн  район администрацияны башчысыны атындан бюсюреу письмола, грамотала берилгендиле. Анда дагъыда  "Жылны юйюрю" деген  Битеуроссей       конкурсну  эсеплерине кёре хорлагъанлагъа берилгендиле.  "Кёп сабийли юйюр" деген номинацияда  экинчи жерге тийишли болгъаны ючюн Чатталаны  Маратны бла Жаннетни юйюрю тийишли болгъанды. "Элли юйюр" деген номинацияда уа  Альберт эм Зурият Харсиевланы юйюрлери белгиленнгендиле. Ала да экинчи жерге чыкъгъандыла.

Къууанчлы байрам уллу концерт программа бла бошалгъанды. Аны ахырында уа "Черек район" деген белгили жыр айтылгъанды.                             

Холаланы Марзият хазырлагъанды.
Поделиться: