Мектеплени санына танг къошулады

КъМР-ни Къурулуш эмда жашау журт-коммунал мюлк министерствосундан билдиргенлерича, республикада «Билим бериу» миллет проектге кёре иги кесек иш бардырылады.  Аны чеклеринде билим бериу учрежденияланы   ырысхы-техника мурдорлары игилендириледи, оборудование бла жалчытылынадыла эм жангы мектепле ишленедиле.

Быйыл да сагъынылгъан проектни себеплиги бла иги кесек иш тамамланырыкъды. Алай бла жууукъ заманда жети жангы школну къурулушу башланырыкъды. Нальчикде – 1500, Бахсанда - 1224, Прохладнада – 560, Псынабода -150, Красносельскоеде – 500, Сармаковода – 275 эм Майскийде – 330 сабийге.

- Арт жыллада сабийлени санына иги кесек къошулгъаны ючюн, аланы жерле бла сылтаусуз этерге, жангы мектепле ишлерге керекди. Аны бла бирге, сагъынылгъан районлада эски школлагъа да тынгылы ремонт этилликди, - деп билдиргенди КъМР-ни къурулуш эмда жашау журт-коммунал мюлк министрини орунбасары Локияланы Алан. 

Объектлени документлери хазыр болгъандан сора, ишлени бардырыргъа подряд организацияланы сайларгъа конкурс ётерикди. Ызы бла, келишим этилип, къурулуш башланырыкъды. 

Мектепле графикден кеч къалмай, келир жылны ахырына битерге керекдиле.