Черек районда Маданият юйлени, сабий садикни да эшиклери ачылгъандыла

Черек районда эки Маданият юйге эмда бир сабий садикге ремонт этилип бошалгъанды. Юйледен бири Къашхатаудады, экинчиси уа Огъары Малкъарда. Биринчисине эмда бу шахарда «Нюр» садикге «Эл тийрелени тынгылы айнытыу» деген къырал программаны чеклеринде, экинчи Юйге уа «Маданият» миллет программаны хайырындан ремонт этилгенди, деп билдиргендиле Къурулуш эм жашау журт – коммунал мюлк министерстводан.

Маданият юйледе ишчиле эшиклени, терезелени, отоу тюплерин алышхандыла, жарытыу, жылытыу эмда таза суу бла жалчытыу системаланы да жангыдан тынгылы жарашдыргъандыла. Чыгъармачылыкъ бла кюреширге итиннген сабийлеге, тамата тёлюге да алада тап болум къуралгъанды: биринчи къауумгъа чыгъармачылыкъны Юйю ачылгъанды, анда уа тюрлю-тюрлю кружокла эмда библиотека къуралгъандыла.

Садикни да ичинде хар несине да тынгылы ремонт этилгенди. Специалистле ол санда аны башын алышхандыла эмда къабыргъалары жылыуну тутарча этгендиле. Бу объектде бир кезиуде юч жюз сабий кечинирге боллукъду. Аны ашханасы, медицина кабинети, музыка эмда спорт заллары да бардыла.

Министерствода айтханларына кёре, быйыл «Маданият» миллет проектни чеклеринде Республикалы гинжи театргъа, Нальчикде жаш къараучуну театрына эмда Дыгулыбгей элде Маданият юйге ремонт этилип бошаллыкъды. Ара шахарда маданият жаны бла айнытыуну Арасыны къурулушу да быйыл бошаллыкъды, дегендиле.

Омарланы Мурат хазырлагъанды.
Поделиться: