Эл мюлкде къармашханлагъа – танг болушлукъ

Къабарты-Малкъарда «Гитче эм орта предпринимательство эмда энчи бир иш бла кюрешгенлеге болушлукъ тапдырыу» миллет проектге, дагъыда «Гитче эм орта предпринимательствону субъектлерини акселерациясы» регион программагъа кёре, фермерчиликни бла эл мюлк кооперацияны айнытыугъа 97,6 миллион сом бёлюннгенди. Аны иги кесеги – 96,6 миллиону - федерал бюджетденди, къалгъанын республика кесинден къошады.  

Ол ахча «Агростартап» грантла къытхан 76 фермерге ётдюрюлгенди. Къырал болушлукъну ёлчеми 84,6 миллион сомну тутханды. Ол санда эл мюлк кооперациягъа бла фермерлеге себеплик этген регион ара  юч миллион сом алгъанды. Андан сора да, тёрт эл мюлк кооператив болушлукъ тапхандыла. Саулай да алагъа он миллион сом берилгенди.

- Фермерчиликни бла эл мюлк кооперацияны айнытыуну баш магъанасы  элде жашагъанланы иш бла жалычытыргъа, ала чыгъаргъан продукцияны сатаргъа эм элде гитче бизнесни къурау бла байламлы башха жумушланы тамамларгъа себеплик этиудю, - дегенди КъМР-ни эл мюлк министри Хасан Сижажев.

Магометланы Сулейман.
Поделиться: