«Дарман салдырыу бла хар адам кесин, жууукъларын да сакъларыкъды»

«Бусагъатда кенг жайыла баргъан къоркъуулу аурууну хорларыкъ жангыз да вакцинацияды. Дарман салдырыу бла хар адам кесин, жууукъларын, тёгерегинде адамланы да сакъларыкъды»,- деп, къатлап айтады Нальчикде 1-чи номерли шахар поликлиниканы баш врачы Аулият Каскулова. Республикада бу къыйын ауруу бла байламлы болумну эмда вакцинацияны магъаналылыгъыны юсюнден да ол былай айтады:

«Жарсыугъа, арт айны ичинде ауруп къыйналгъанланы, ауушханланы да саны ёсюп барады. Бусагъатда госпитальланы бары да къыстау ишлейдиле. Жарсыугъа, ала бир ненча сагъатны ичинде толуп къаладыла. Бек осалы уа - сабийле да ауруйдула.

Мен хар кимге да былай эсгертирге сюеме: халкъыбызны асламы заманында дарман салдырса эди, быллай халгъа къаллыкъ тюйюл эдик. Кертиди, бусагъатда вакцинация тири барады. Былайда чертип айтыргъа трийишли кёреме, вакцина этдирген адам ауруса да, ауругъаны женгил ётеди, ол къыйыннга кетмейди.

Дарман салгъан битеу пунктла байрам, шабат, ыйых кюнледе да ишлейдиле. Укол этдирмегенле кеслери да келсинле, юйде болгъан абадан адамларын да келтирсинле. Жууукъларыбызны, ахлуларыбызны да саулукъларын, ол угъай да, жанларын сакълайыкъ.

Адамгъа саулугъундан багъалы бир зат да жокъду, жууугъунгу, ахлунгу тас этгенден уллу ачыу, къыйынлыгъ а къайда! Бек тилейме, келир заманыбызны юсюнден сагъыш этигиз».

Эсге салайыкъ: Къабарты-Малкъарда дарман салдырырча 82 стационар пункт ишлейди. Ала республиканы битеу районларында, шахарларында да бардыла. Аны бла бирге организациялагъа барып дарман салгъан бригадала да къуралыпдыла.

Дагъыда республикада жашагъанла «Вакцинация в КБР» деген чат–бот бла да хайырланыргъа боллукъдула. Анда битеу керекли билдириуле бардыла, вакцинация этген пункт къалайда болгъанын кёргюзтедиле.