Казбек Коков РФ-ни Къырал Советини комиссиясыны жыйылыууна къатышханды

КъМР-ни Башчысы Казбек Коков РФ-ни Къырал Советини къурулуш эмда ЖКХ жаны бла комиссиясыны жыйылыууна къатышханды. Кенгешни комиссияны башчысы, Татарстанны Президенти Рустам Минниханов бардыргъанды. Анда жашау журтла-коммунал мюлк бёлюмге оноу этиуню игилендириуню амаллары сюзюлгендиле.

Жыйылыугъа къатышханла ЖКХ-ны инфраструктура объектлерин жангыртыргъа кереклисин айтхандыла, ол санда миллет проектлени болушлукълары бла да. Дагъыда фатарланы энчи жылытыу амалгъа кёчюуню иги эмда осал жанлары да сюзюлгендиле, зыбыр коммунал къалгъан-къулгъанланы кетериуню тап къурамай амал болмагъаныны юсюнден да айтылгъанды. Регионлада инженер сетьлени, ЖКХ-ны ырысхы-техника онглары иги да тозурагъанларыны юсюнден да эсгертилгенди.

Рустам Минниханов  бёлюмню ишин игилендириу жаны бла оюмланы эмда амалланы жыйыу къыстау баргъанын билдиргенди. Аланы араларында кёп фатарлы юйлеге тынгылы ремонт этиуню программасы бютюн хайырлыгъа саналады. Этилген жумушла ючюн хакъны тохташдырыуну норматив базасын тап халгъа келтирирге кереклисини юсюнден да айтылгъанды.
 
Россейни Президенти Владимир Путинни буйрукъларына кёре, инфраструктураны айнытыугъа инвестицияла салынырча этиу – ЖКХ-ны сферасында баш борчладан бириди.
 
Россейни вице-премьери Марат Хуснуллин а ЖКХ-ны ишин жангыча къурауну амаллары бла шагъырей этгенди. Аладан бирлери - инфраструктура кредитледиле, Миллет ырахатлыкъны фондуну ахчасын ЖКХ-ны фондуна бериудю. Хуснуллин ЖКХ-ны энергия къоранчларына эс бургъанды, аланы эмда башха къоранчланы азайтыу жаны бла мадарланы «жол картасы» жарашдырылгъанын билдиргенди.

Поделиться: