Сёлешиуню магъанасы – республикалы сабий клиника больницаны жангыртыу, саусузланы дарманла бла жалчытыу

Къабарты-Малкъар Республиканы Башчысы Казбек Коков КъМР-ни Правительствосуну Председателини орунбасары Марат Хубиев эм КъМР-ни саулукъ сакълау министри Рустам Калибатов бла Республикалы сабий клиника больницаны тынгылы ремонтуна жораланнган ишчи кенгеш бардыргъанды. Аны аллында Россейни премьер-министри Михаил Мишустин, сабий больницаны жангыртыуну эскиз проектин къабыл кёрюп, резерв фондну ырысхысындан аны бардырырча 124,9 миллион сом бёлюрге тийишлисин белгилеген бегимге къол салгъанды.

Казбек Коков жууаплы министерстволагъа ишге тири къатышырча буйрукъла бергенди. Сабий больницаны тынгылы ремонтуну проекти 2020 жылда декабрьде сюзюлгенди, Башчы учреждениягъа келген кезиуде. Больницаны жангыртыргъа эм керекли оборудование бла жалчытыргъа, приёмный бёлюмюн кенгертирге мурат барды.

Бусагъатда РДКБ-ны мурдорунда республиканы педиатрия службасы ишлейди, мында 15 профильли ызда медицина болушлукъ тапдырылады. Диагностика бёлюмде «Саулукъ сакълау» миллет проектни хайырындан бюгюннгю кюннге келишген КТ, МРТ, офтальмология оборудование салыныпдыла. Жыл сайын больница республиканы районларындан эм шахарларындан, къоншу регионладан 15 мингден артыкъ сабийге медицина болушлукъ тапдырады.

Республикалы эм бюджетден болмагъан ырысхыгъа мында кезиулю ремонт бир ненча ахыр жылда бардырылгъанды, алай ремонт этилмегенлей да бир ненча бёлюм къалгъанды, инженер ызланы алышындырыу да изленеди. Больница онкология жаны бла бийик технология болушлукъ берип башлагъанды, алай бирси ызлада аллай болушлукъну тапдырыр ючюн хауаны тазалагъан шёндюгюлю системаны тохташдыргъан, медицина оборудование бла андан ары жалчытылыннган тынгылы ремонт изленеди. Аны хайырындан травматология эм хирургия дегенча ызланы жангы даражагъа чыгъарыр онгла да къураллыкъдыла.

Казбек Коков, тийрени инфраструктурасы да магъаналы болгъанын чертип,  больницаны арбазын тапландырыргъа, гитче архитектура юлгюле сюерге, жаяу жюрюген жерлени игилендирирге буюргъанды. Жыйылыуну чегинде саулукъ сакълау бла байламлы башха соруула да сюзюлгендиле.

Рустам Калибатов регионда коронавирус жукъгъанланы саны кёбейе баргъанын белгилегенди. Госпитальлада 735 саусуз болгъанларын, амбулатор багъыуда 1300-ден артыкъ инсан тургъанын айтханды. Тохтаусуз халгъа къарап туруу ауругъанлагъа деп заманында препаратла сатып алыргъа онг береди.

КъМР-ни Башчысыны буйругъу бла Саулукъ сакълау министерство республикалы бюджетден ахчагъа кёбюулеге чырмаулукъ этген дарманланы 8,4 миллион сомгъа сатып алгъанды. ОМС-ни ырысхысына Онкология диспансерде да аллай тюрлю дарманланы сатып алыу иш бардырылады. Амбулатор багъыуда болгъан кезиулеринде онкология саусузланы дарманла бла жалчытырча КъМР-ни Правительствосу 2021 жылны ахырына дери республикалы бюджетден ырысхы бёлюу соруугъа къарагъанды.

Казбек Коков быллай жарсыула бусагъатда аслам регионда тюбегенлерин, алай саусузланы дарманла бла чурумсуз жалчытырча ол сорууну контрольда тутаргъа тийишлисин белгилегенди.