Нартюх салып кюрешедиле

Бизни республикада ёсген мирзеулюк битимлени арасында энчи жерни нартюх алады дерге боллукъду. Аны ёсдюрюу бла иги кесек мюлк кюрешеди. Ол кесек жерде битеди эм дайым бай тирлиги бла къууандырады.

Бюгюнлюкде да районлада аны салып кюрешедиле. Муниципалитетледен билдиргенлерича, анга бёлюннген 132,4 минг гектардан 5,5 минг гектарда салып бошагъандыла.

Мирзеулюк нартюхню иги кесеги неда 60 проценти, Терк, Прохладна эм Басхан районлада ёсдюрюледи. Арт жыллада андан бай тирлик алып, республика кесини алгъыннгы жетишимлерин окъуна бузуп башлагъанды. Былтырны юсюнден айтханда,1048 минг тонна тирлик жыйылгъанды, неда буруннгу жылдан эсе 4,2 процентге кёп. Алай бла юч жылгъа жетишимин 70 кереге ёсдюрюрге онг табылгъанды. 

Жетишимле болдурургъа жангы технологияланы сингдириу, ол санда жауун халда сугъарырча машиналаны, минерал семиртгичлени, тюрлю-тюрлю пестицидлени да тийишлисича хайырланыу, агротехника жумушланы заманында тамамлау себеплик этгендиле.