Районну атындан терскъолчула эриширикдиле

Тырныауузну 6-чы номерли школунда «Атам, анам, мен - спорт юйюр» деген байрам бардырылгъанды. Аны «Сабийлени навигаторлары» деген Битеуроссей проектни чеклеринде Элбрус районну билим бериу управлениясы къурагъанды. Аны бардырыугъа координатор Будайланы Лиза уллу къыйын салгъанды. Анга бу жумушну тийишли ётдюрюрге районну школларыны директорларыны кенгешчилери да болушхандыла.

Эришиуле Юйюрню жылына жораланып бардырылгъандыла. Аны баш мураты юйюрлени келечилерин бир бирлерине бютюн къаршы этиу, ала солуу кезиулерин гаджетледен кери къурай билирге юйретиу, тёлюден тёлюге къала келген тарых магъаналы затланы эсгертиу эди. Спортха да аслам эс бёлюрге юйретиу эм ызы бла кючлю командаланы сайлау да бу ишде аслам жер алгъанды.

Бу эришиулеге къатышханланы алларында уа районну билим бериу управлениясыны таматасы Атаккуланы Нюржан сёлешгенди. Ол хар юйюрге да жетишимли болурларын тежегенди.  Битеу а анга 7 команда къатышхандыла: Тырныаууздан Ботталаны, Шауаланы эм Долговланы юйюрлери, Терс-Къолдан Усовланы юйюр, Кёнделенден Атмырзаланы бла Черкесланы юйюрлери эм Бедикден Бабаланы юйюр.

Конкурсха къатышханлагъа жыйылгъанла кёл этдирип, къызыу къарсла бла тюбегендиле. Алагъа деп сейир эришиуле къурагъан эдиле. Сёз ючюн, биринчисинде ала юйюрлерини суратын 5 минутну ичинде ишлерге керек эдиле. Экинчи борч а аналаны алларында салынып эди. Ала да берилген къумачладан, целлофанладан, газет кесекледен 5 минутха жыйрыкъ бичип, кёклеп, къызларына кийдирирге керек эдиле. 

Андан сора уа спорт конкурсла башланнгандыла. Алада командала топ бла, машоклада чабышыргъа, эстафетада, скакалкада секирирге керек эдиле. Ала бары да юйюрлени уллу сейирлерин къозгъагъандыла. Алай бла къайсылары бегирек хазыр болгъаны да ачыкъланнганды. Алай бла биринчи жерге терскъолчула Усовланы юйюрлери чыкъгъанды. Экинчи жерде, балларына кёре, Черкесланы, Атмырзаланы эм Долговланы юйюрлери орналгъандыла. Ючюнчю жерни уа Шауаланы, Ботталаны эм Бабаланы юйюрлери юлешгендиле.

Алай бла, Усовланы юйюр Элбрус районну атындан проектни регион бёлюмюне къатышырыкъды.