Кючлерин сынагъандыла

Бу кюнледе Элбрус районну картингчи къаууму Краснодар крайны Апшеронск шахарындан къайтхандыла. Анда энчи аскер операцияда жан берген жигитлени хурметлерине аталгъан эришиуле ётген эдиле.

Алагъа Тырныаууздан, Атажукинодан, Нарткъаладан, Нальчикден, Шимал Осетия-Аланиядан, Новороссийскден, Курскдан, Пролетарскден, Курганинскден, Ростовдан, Апшеронскдан бла Невинномысскдан алтмышдан артыкъ спортчу къатышханды.

Пилотубуз  Гюлюйланы Керим стартны ючюнчю болуп башлагъанына да къарамай, финишге биринчи болуп келгенди. КъМР-ни къаууму, аланы араларында Элбрус райончула да болуп, экинчи битеукъауум жерге тийишли болгъанды.

Райондан  спортчуланы биргелерине  тренерлери Алексей Бабенко бла бир къауум сабийни жууукълары баргъандыла.

Спортну бу тюрлюсюн иги ангыламагъанла,  анга сууукъ кёзден къарап да къоядыла. Алай аны  хар жоругъу, излеми, анга салыннган уллу кюч бла да шагъырей болсала, анга башха кёзден къарап башлайдыла. Кекртиди, автоспорт къачан да къоркъуулу болгъанды, бютюнда анга сабийле къатыша эселе.

Спортчуланы кереклисича кийиндиредиле аланы башдан-аякъгъа, хар санын къоруулаучу энчи кийимлери болургъа керекди. Аны себепли спортчуланы биргелерине баргъанлагъа, жашланы хар затларына  да эс буруп, эришиуге алай чыгъарыу жууаплы борчду.

Бу эришиулеге къатышыу  жашлагъа  сынамларын, кючлерин да сынап, келлик жангы спорт кезиуге саллыкъ борчларын ангыларгъа аламат онг болгъанды.