Сабийликни дуниясында

Бу кюнледе Тырныауузну Сабий искусстволаны Абайланы Солтан-Бек атлы школуну арбазы къууанчлы эди. Малкъар халкъны жангырыу кюнюне  аталгъан «Сахна илхам» деген музыкалы адабият фестиваль-эришиу болгъанды. Анга районну тогъуз билим бериу учреждениясы къатышханды.

Байрам эришиу башланырдан алгъа, элледен келген сабийлени жарыкъ, къууанчлы бетлери абаданланы да насыплы этгендиле. Сабийликни дуниясыча таза, кёзбаусуз дунияда керти насып жашайды. 
Байрамны районну Билим бериу управлениясы бла «Сабийликни навигаторлары» деген биригиу къурагъандыла. Эришиуню управленияны окъуу-низам жаны бла методисти  Джаппуланы Аминат бардыргъанды. Эришген сабийлени фахмуларына багъа бичерге уа хурметли жюри чакъырылгъанды. 

Эришиу бек гитчеледен башланнганды. Тырныауузну 10-чу номерли сабий сады бла Кёнделенни – 1-чи номерли школуну сабий сады келгенлени кеслерини фахмулары бла къууандыргъандыла. Жыргъа устала, шатык сёзлю балачыкъланы араларында айырыу бек къыйын болса да, тырныауузчулагъа – 1-чи, кёнделенчилеге уа 2-чи жерле бергендиле.

Мектеплени араларында уа Тырныауузну 3-чю номерли школуна Гран-при, 6-чы номерли школ 1-чи жерге, 5-чи номерли гимназия бла Кёнделенни 1-чи номерли школу 2-чи жерге, 1-чи номерли лицей да 3-чю жерге тийишли болгъандыла. Элбрус бла Быллым эллени школларына да къатышханлары ючюн махтау къагъытла бергендиле. Эришиуге къошулгъан тогъуз къауумну да татлы саугъала бла къууандыргъандыла. 

Жюри бир аууздан бу сабийлени хазырлагъан устазлагъа жюрек ыразылыкъларын билдиргендиле. Къауумла бири къалмай, сахнагъа чыгъыулары не байрам бла байламлы болгъанларын иги ангылагъанлары кёрюне эди. Артыгъыракъда чертип айтырча уа, 6-чы номерли школну жашчыкъларыны кёчгюнчюлюкге аталгъан жыр айтыулары болгъанды. Назму окъууда, сахна оюнда да хар сёзню магъанасын шарт айтхан окъуучуларыбыз бизни жилятхан, къууандыргъан да этгендиле. 

Байрамны ахырында сёз Элбрус районну Жамауат палатасыны таматасы, районну хурметли инсаны  Ботталаны Ибрахимге берилгенди. Ол бюгюннгю фестивальны эришиуча угъай, байрамча кёргенин энчи черте, ана тиллеринде ариу сёлешалгъан сабийлеге ыспас этгенди. Бу кюн бизни тарыхыбызны унутулмаз кюнлеринден бири болгъанын, абадан тёлю кёп къыйынлыкъ сынагъанын да айта, энди бир заманда да быллай кюйсюзлюкню, артыкълыкъны жаш тёлю, саулайда миллети сынамазын тилегенди. Хар заманда да ана тилибизде бардырылгъан быллай ариу ишлеге къатышып, маданиятыбызны айныууна къошумчулукъ этерге чакъыргъанды сабийлени.  

Джаппуланы Аминат: «Халкъыбыз тёзюмлю, ариу къылыкълы, жарашыулу болгъаны себепли, бизни аппаларыбыз, аммаларыбыз узакъ тыш жерледе 13 жылны жашап, тиллерин тас этмей, атларын иги бла айтдырып, башха миллетлеге да юлгю болуп къайталгъандыла. Биз да, мындан ары ол ариу ыз бла бара, тилибизде сёлеше, адетлерибизни сакълай, ариу жашайыкъ! Саулукълу, насыплы тёлю болуп ёсеригигизни тилейме!» -дегенди жыйылыуну ахырында.
Ол кюн сабийле, жюри кенгеше тургъунчу, сахнада, залда да уллу таулу той бардыргъандыла. Керти да, быллай жарыкъ кёллю тёлюбюз бла ёхтемленирчады!