Боксха къуллукъ этгенли – 30 жыл

Отуз алты жыл мындан алгъа, 1987 жылда, Тырныауузда В.А. Губанов атлы «Геолог» спорт-саулукъ кючлеу комплексде оюн эм гимнастика залладан сора боксдан жарау этерча зал ишлеп башлагъанды.

Ол Север Кавказда биринчи болгъаны себепли анга уллу магъана берилгенди. Шахарны башчылары да аны ачылыуу не къадар къууанчлы халда ётерине къайгъыргъандыла эм муратларына да жетгендиле. Ол кезиуде Совет Союзну бла Кубаны боксдан жыйымдыкъ командалары Минги тауда юйретиу-жарау этиу жыйылыулада эдиле, ала уа дунияда эм кючлюлеге саналгъандыла. «Геологну» рингин да ала, бир бирлери бла сермешле бардырып, биринчи сынап кёргендиле.

Андан сора Тырныауузда битеусоюз, битеуроссей, халкъла аралы даражалы эришиуле къуралып башлагъандыла Мында профессионал боксчула рейтинг сермешлерин бардыргъандыла. Жер-жерли спортчу Доттуланы Ахмат «Дунияны континентле аралы чемпиону» деген атын «Геологда» алгъанды. Аны аты уа жангыз Къабарты-Малкъарда угъай, битеу къыралда да боксну тарыхына киргенди. Ахматны ол тюбешиуюне шахарда, республикада да сейир уллу болгъанды. Трибуналагъа 600 жер бар эди, алай бу сермешге къараргъа келгенле адамла барысы да алагъа сыйыналмагъандыла, алагъа деп къошакъ шинтикле окъуна келтирилген эдиле. Алай бла къараучуланы саны 1500-ге жетген эди.

Арт заманда да спорт комплексде тюрлю-тюрлю даражалы эришиуле бардырылгъанлай турадыла. Росейни тёрт кере чемпиону, Шаркъ Европаны эки кере чемпиону, дунияны континентле аралы эки кере чемпиону Доттуланы Ахматны хурметине жораланнган турнир тёрели халда къуралады. Тренер Муаед Дышековха, спортну устасы Текуланы Маратха аталгъан эриишуле да дайым ётедиле. Россейли студент спорт союзну биринчилиги бла башха турнирле бирбири ызындан талай жылны адамланы жыядыла, умутландыргъан жаш боксчуланы айырадыла.

 Былайда бу зал ачылгъаны бла Элбрус районда бокс иги айныгъанын, аны бла кёпле кюрешип башлагъанларын да белгилерчады. Жер-жерли спортчула да атларын айтдырадыла. Кеси заманларында Къумукъланы Юсюп, Виталий Майоров, Алибек Газов,  Замир Темиров, Азамат Карамышев, Мурат Батыров, Роман Миргородский жетишимли болгъандыла. Боксчуланы жаш тёлюлери да аладан артха къалмазгъа ушайдыла. Сёз ючюн,   Хамзат Исаратов, Макытланы Хасан, Виктор Попов, Бабаланы Башир эм башхала болгъан жерлеринде майдалсыз къайтмаучудула.