Спорт

2009 жылдан бери «Спартак-Нальчик» футбол клубну мурдорунда сабийле юйренирча школ ишлейди, анга алты-жети жыллары толгъанланы  аладыла. Бу ишни баш мураты - сынамлы, ахшы спортчуланы тышындан излемей, кесибизде хазырлауду. Бюгюнлюкде анда талай оюнчу къауумну хазырлайдыла, ала, эришиулеге къатыша, жетишимлери бла да къууандырадыла. Алай биз аланы юслеринден хазна зат билмейбиз. Ол себепден бюгюн бизни ушакъ нёгерибиз сабий команданы тренери Цийкъанланы Исламды.

Арт жыллада жаш адамла неден да бек спорт бла кюреширге итинедиле, дерге боллукъду. Аланы асламысы спортну кюч тюрлюлерин сайлайдыла, уллу жетишимле да болдурадыла. Хабаздан Тетууланы Жамалны жашы Камил да аллай уланларыбызны санынданды. 26-жыллыкъ жаш Россейни спортуну устасыды. Къабарты-Малкъар къырал эл мюлк университетин тауусханды, бусагъатда жарау этгенден тышында, бизнес бла да кюрешеди. Бюгюн ол бизни ушакъ нёгерибизди.

Нальчикде сабий чыгъармачылыкъны «Эрудит» арасында, Ананы кюнюне жораланып, шахматладан эришиуле къуралгъандыла, алагъа 32 сабий къатышханды.  

Къазахстанда эркин тутушуудан XII халкъла аралы эришиу бардырылгъанды, ол СССР-ни кезиуюнде аты айтылгъан политика эм жамауат къуллукъчу, Социалист Урунууну Жигити Динмухамед Кунаевни хурметине къуралгъанды. 

Нальчикде Универсальный спорт мекямда самбодан СКФО-ну биринчилиги бардырылгъанды. Анда алчы жерле ючюн 300-ден аслам жаш бла къыз тутушхандыла, Къабарты-Малкъардан гёжефле 10 майдал къытхандыла.

Тырныауузну «Геолог» спорт-саулукъландырыу комплексинде   грек-рим тутушуудан Элбрус районну биринчилиги ётгенди. Анга юч жыл сандагъы къауумда 115 жаш гёжеф къатышханды. Аланы араларында,  Олимпиадалы резервни Байзуллаланы Юсюп атлы спорт школуну сохталарындан сора да, Нальчик шахарда «Гладиатор» клубну, Зольск эмда Лескен районланы келечилери да  болгъандыла.

Каспийск шахарны Али Алиевни атын жюрютген спорт мекямында тхэквондону WTF тюрлюсюнден «Чемпион» спорт клубну саугъаларына  битеукъырал эришиу бардырылгъанды. Аны чеклеринде дагъыда 10-11-жыллыкъ сабийлеге «DAG OPEN» деген турнир къуралгъанды. Эришиулеге Россейни регионларындан, Къазахстандан бла Азербайджандан 500-ден аслам адам къатышхандыла. 

Адамны эм уллу байлыгъы – аны саулугъуду. Бу оюмну тюзлюгю аз да ишеклик туудурмайды. Саулукъну сакълар ючюн, кёп тюрлю амалла бардыла. Алай аладан эм магъаналысы, хайырлысы да, баям, физкультурады. Анга шагъатлыкъгъа бизни ёмюрню, бурун цивилизацияланы да тёрелерин келтирирге боллукъду, хар миллетлени кеслерини энчи методикалары болгъанды. Аланы барысын да бир жорукъ бирикдиргенди – инсаннга ауруулагъа хорлатмазгъа, хомух, эринчек болмазгъа, дайым къымылдаргъа, ишлерге керекди. Анга уа, бек биринчи, физкультура юйретеди.

Жантуудуланы Азамат жетишимли спортчуду, тренер болуп, Хасанияда къатыш единоборстволадан спорт залда сабийлени да юйретеди. Анга 26 жыл болады, Кёнделенде ёсгенди. Бюгюнлюкде ол Нальчикде МВД-да ишлейди, ведомствону атындан аскер самбодан, къол тюйюшден эришиулеге къатышады. Азамат аскер самбодан бла кикбоксингден спортну устасыды, тайский боксдан бла грепплингден спортну устасына кандидатды.