Спорт

Воронежде эркин тутушуудан битеулю ауурлукъ къауумда Россейни чемпионаты бардырылгъанды. Анда майдалла ючюн эллиге жууукъ эм кючлю гёжеф тутушхандыла, аланы араларында спортну халкъла аралы усталары да болгъандыла. 

Нальчикде Универсал спорт арада  Ахмед Жилетежевни хурметине  эркин тутушуудан битеуроссей эришиу бардырылгъанды. Анда эки кюнню ичинде майдалла ючюн къыралыбызны жыйырма беш шахарындан юч жюзге жууукъ гёжеф сынашхандыла. 

Нальчикни аэропортунда дунияны грепплингден чемпионатында хорлагъан гёжефлеге – Мухамед Урусовха бла Таппасханланы Исламгъа – къууанчлы халда тюбегендиле. Аэропортну аллында майданда спортчуланы жууукъ-ахлулары, тренерле, къараучула да жыйылгъандыла. Аланы спорт министрни орунбасары Заур Хежев алгъышлагъанды. 

Кёп болмай Владикавказ шахарда Россейни Аскер къол тюйюшледен союзу къурап, «Мамырлы Кавказ-2025» деген эришиу ётгенди. Анда, битеу стильли каратеден 8-9-жыллыкъланы араларында эрише, яникойчула Малкъондуланы Темирлан (37кг) бла Залимхан (35 кг) жетишимли болуп къайтхандыла.

Бу кюнледе Воронежде ашихара каратеден Россейни чемпионаты бла биринчилиги бардырылгъандыла. Ары къыралыбызны 16 регионундан 700 каратечи келгендиле. Къабарты-Малкъарны жыйымдыкъ командасыны къауумунда бу эришиулеге 9 спортчу къатышхандыла. 

Кёп болмай Кисловодск шахарда дзюдодан «Олимпиадагъа умутла туудура» деген ат бла XVIII регионла аралы турнир бардырылгъанды. Анга 2008-2018 жыллада туугъан 550 спортчу къатышхандыла. 

«Каисса» шахмат арада классика, терк эм блиц шахматладан сабийлени эм жаш адамланы араларында республиканы биринчилиги къуралгъанды. Анда хорлагъанлагъа СКФО-ну биринчилигине къатышыргъа эркинлик берилгенди.

Нальчикге чабыуул этилгенли 20 жыл ётгенине жораланып, «Гладиатор» спорт арада 2012-2013 жыллада туугъан жашчыкъланы араларында дэюдодан  эришиу къуралгъанды. Ол Россейни бла Къабарты-Малкъарны гимнлеринден, шахарны къоруулай жан берген жигитлени хурметлерине бир минутну шош туруудан башланнганды.

11-12 октябрьде Элбрус районну Тегенекли элинде право низамны сакълаучу органлада къуллукъларын толтура ёлген полициячыланы хурметлерине каратеден регионла аралы турнир бардырылгъанды. Анга СКФО-ну жер-жерлеринден 300-ге жууукъ спортчу къатышхандыла. 

Ставропольда аскер къол тюйюшден Россейни кубогу ючюн сермешле орта кюн бошалгъандыла. Анга къатышханланы араларында Каркаланы Омар да барды.