Спорт

Астраханьда художестволу гимнастикадан 13-15-жыллыкъ къызчыкъланы арасында Россейни окъуучуларыны спартакиадаларыны экинчи кесеги бардырылгъанды. Анга Юг эм Шимал-Кавказ федерал округладан 13 къауум къатышханды.

Краснодар крайда футболдан «Къобанны кубогу. Жангырыу 2024» деген эришиу бардырылгъанды. «Эм кючлю команда» деген ат ючюн башха-башха регионладан 150-ден аслам жаш спортчу кюрешгенди.

Биринчи майда Нальчик шахарны ипподромунда Жаз башыны эм Урунууну байрамына аталып  чаришле  болгъандыла. Бир минг бла эки жюз метрге, дагъыда эки минг метрге  узакълыкъда арап эм ингилиз къауумланы атла  къайсы онглуракъ болгъанын кёргюзтгендиле. Бусагъатда ат спорт бизни республикада терк айнып барады. Биринчи май 2024 жылны чариш кезиую да башланнган кюннге саналгъанды, къараучуланы ипподромгъа жыйылгъанлары халкъны бу эришиулеге сейирлери болгъанына шагъатлыкъ этеди.

Къабарты-Малкъарда энчи аскер операцияны кезиуюнде ауур жаралы болгъан аскерчилеге аталгъан спорт проект жашауда бардырылады, деп билдиредиле республиканы Спорт министерствосундан.

Республиканы спортну беш тюрлюсюнден  жыйымдыкъ командасы  олимпиаданы эки кере чемпиону Андрей Моисеевни хурметине бардырылгъан  битеуроссей эришиуледен жетишимли болуп къайтханды. Къызланы къаууму энчи эсепде биринчи жерлеге тийишли болгъандыла. Барысындан да алгъа  Атабийланы Малика чыкъгъанды, кюмюш майдал Къалабекланы Азизагъа жетгенди, «доммакъны» да  Атабийланы Алия алгъанды.

Нальчикде дзюдодан Сбербанкны кубогуна регионла аралы эришиу бардырылгъанды. Анга къыралны 7 субъектинден 200-ден аслам спортчу къатышханды. Битеукоманда эсепде эм кючлю Къабарты-Малкъарны къаууму болгъанды, экинчи жерге – Шимал Осетия-Аланияны, ючюнчюге уа – Чеченни келечилери чыкъгъандыла.

Невинномысск шахарны «Олимп» спорт арасында каратени киокусинкай тюрлюсюнден «Кавказны къабакълары» деген ат бла Ставрополь крайны биринчилиги бла чемпионаты бардырылгъандыла. Анга башха-башха жыл санлада 266 спортчу къатышханды.     

Бу кюнледе Дондагъы Ростовда шёндюгюлю пятиборьядан Олимпиада оюнланы эки кере чемпиону Андрей Моисеевни саугъасына Битеуроссей эришиуле ётгендиле. Анга къыралны 10 регионундан 200-ден артыкъ 11-15-жыллыкъ жаш спортчула къатышхандыла. Къабарты-Малкъарны командасы да анда кесини кючюн кёргюзтгенди.

Дондагъы Ростовну «Левенцовский» спорт арасында эстетика гимнастикадан «Оскар» деген облатсь даражалы тёрели эришиу къуралгъанды. Ана саугъала ючюн алты жыллары толгъан эм андан абадан эм фахмулу спортчула сынашхандыла. 

Тырныауузну 6-чы номерли школунда «Атам, анам, мен - спорт юйюр» деген байрам бардырылгъанды. Аны «Сабийлени навигаторлары» деген Битеуроссей проектни чеклеринде Элбрус районну билим бериу управлениясы къурагъанды.