Спорт

Черкесскде «Юбилейный» спорт арада тхэквондону WTF тюрлюсюнден «Россейни тхэквондодан союзуну президентини кубогу» деген аты бла халкъла аралы эришиу бардырылгъанды. Даражалы турнирге къыралыбызны 45 регионундан, Белоруссиядан, Армениядан бла Къазахстандан 600-ден аслам юниор, абадан спортчу эм сакъатлыкълары болгъан атлетле къатышхандыла.

Тырныауузчу гёжеф Заур Курамагомедовну эм уллу хорламы 2012 жылда Лондонда Олимпиада оюнлада грек-рим тутушуудан доммакъ майдалны алгъаныды. Ары дери ол дунияны чемпионатында ючюнчю болгъанды, Европаны Софияда бла Бакуда чемпионатларыны кюмюш эм доммакъ призёруду, Россейни эки кере чемпионуду. Жетишимлери ючюн анга «За заслуги перед Отечеством» орденни майдалы берилгенди, Россейни спортуну сыйлы устасы деген ат да аталгъанды.

Нальчикде комплексли единоборстволадан СКФО-ну биринчилиги къуралгъанды. Эришиулеге Дагъыстандан, Чеченден, Ингушетиядан, Шимал Осетия-Аланиядан бла Къабарты-Малкъардан 144 гёжеф къатышхандыла, ала 6 жыл сан къауумда тутушхандыла.

Нальчикде «Спартак» стадионда регбиден ЮФО-ну бла СКФО-ну биринчиликлери бардырылгъанды. Анга Краснодар крайдан, Кърымдан бла Къабарты-Малкъардан 17 жыллары толмагъан спортчуладан къуралгъан командала къатышхандыла. Баш судьяны къуллугъун Залим Докшукин толтургъанды.

Республикада арт кезиуде жангы турист маршрутла къураладыла, жолла тапландырыладыла, туризм инфраструктура айнытылады. Ол барысы да адамланы солууларын Къабарты-Малкъарда ётдюрюрге кёллендиреди. Курортла эм туризм министерстводан билдиргенлерине кёре, быйылны жангыз да биринчи жарымында регионда 500 мингден аслам турист солуп кетгендиле.

Билдиргенибизча, бюгюнлюкде спортну жай тюрлюлеринден Битеуроссей спартакиадала ётедиле. Алада дзюдочу жашыбыз Мисирланы Исмайыл бла Локияланы Жамболат жетишимли болуп, бизни «алтын» эм «кюмюш» бла къууандыргъандыла. Орта кюнню ингиринде уа Къазан шахардан энтта да  бир иги хапар келгенди. Арт жыллада атын иги бла айтдыра келген гёжефибиз Россейни эки кере чемпиону Шауаланы Малик эришиулени финалына чыкъгъанды.

 Назраньда самбодан жашланы араларында «Кубок Чингиз» деген аты бла битеуроссей эришиу къуралгъанды, анга бизни республикадан Бахсанны спорт школуну келечилери къатышхандыла. Ала, алты алтын, тёрт кюмюш эм он доммакъ майдал къытып, битеукоманда эсепде биринчи жерни алгъандыла.

 Кеслерини ауурлукъ къауумларында Мухамед Жиляев, Къудайланы Ислам бла Беслан, Темирлан Каншоев, Темирлан Кочесоков, Кантемир Лотоков хорлагъандыла, хорламгъа итиниулюгю ючюн энчи саугъагъа Муса Бесланеев тийишли болгъанды. Спортчуланы тренерле Мурат Пченашев бла Султан Карамышев юйретедиле. 

 Физкультурникни кюнюне аталып, Нальчикде баскетболдан «Оранжевый мяч» деген эришиуле бардырылгъандыла. Турнирни республиканы Спорт министерствосу, бБаскетболдан федерациясы эм спортну бу тюрлюсюнден экинчи номецли школ къурагъандыла. Анга аслам команда – 180 адам – къатышхандыла.

Бахсанда регбиден тёрели эришиу бардырылгъанды, ол спортну бу тюрлюсюню ветераны Михаил Суановну хурметине аталгъанды. Эришиуню шахарны администрациясы, «регбиги Цюг» академиясы бла республикалы федерациясы къурагъандыла.

Таулада чабыуну сюйгенле Минги тауда онунчу «Alpindustria Elbrus Rase» фестиваль бардырылгъанды. Республиканы курортда эм туризм министерствосундан билдиргенлерича, анга 1400-ге жууукъ адам къатышханды.