Спорт

Халкъыбызны атын айтдыргъан спортчуларыбыздан бири дзюдочу Мисирланы Исмайылды.  Кеси ауурлугъунда (66кг.) ол бюгюнлюкде Россейни жыйымдыкъ командасында биринчи тизмедеди. Мисир улу кёп даражалы турнирле бла чемпионатлада хорлай келеди. Ол къатышхан ахыр эришиу август айда бардырылгъан Битеуроссей спартакиада эди. Анда таулу жаш, «алтын» ючюн сермешде алчылыкъны жибермей, чемпион атха тийишли болгъанды.

Тырныауузда «Геолог» спорт комплексде боксдан Республикалы ачыкъ турнир ётгенди. Анга 2007-2010 жыллада туугъан жашла къатышхандыла.

Нальчикде «Универсальный» спорт арада грек-рим тутушуудан регионла аралы эришиу бардырылгъанды. Ол СССР-ни сыйлы тренери Владимир Лобжанидзени хурметине къуралгъанды.

Черек районда сабий майданла, бассейнле бла кемпингле ачыллыкъдыла. Республиканы Курортла эм туризм министерствосуну келечилери «Туризм эм къонакъбайлыкъны индустриясы» миллет проектге грант болушлукъ этиуню чегинде къурулушлары баргъан объектлеге къарагъандыла.

Чечен Республикада къатыш единоборстволадан «ACA Young Eagles 31» атлы турнир бардырылгъанды. Анда 66 килограмм ауурлукъ къауумда биринчи жерни  бизни республикадан Жаппуланы Альберт алгъанды. Турнирни баш сермешинде ол биринчи раундда окъуна, бууу приёмну хайырланып, чеченли гёжефни хорлагъанды.

Адыл-Суу ауузда эм ариу жерледен бири – Гюржю бла чекде Башкара бла Гумачи тауланы орталарында орналгъан Джан-Туган къаяды. Аны бийиклиги 4012 метрди, юсюн къарла бла чыранла жабыпдыла. Ол туристлеге, бютюнда уа альпинистлеге сейирди. «Адыл-Суу», «Шхельда» эм «Джантуган» алпинист лагерьле мында ишленнгендиле, алада ёрлеуню аллында тау хауагъа юйренирча бир кесек заманны турургъа неда солургъа боллукъду. Кюнню халы мында терк тюрленеди, башында уа дайым да сууукъ желле урадыла. Анга ёрлеу маршрутла буз-къар жолла бла барадыла, къыйынлыкъларына кёре ала 2А – 3Б къауумлагъа киредиле.

Нальчикде каратени киокусинкай тюрлюсюнден Къабарты-Малкъарны биринчилиги бардырылгъанды, анга бизни республикадан, Шимал Осетия-Аланиядан, Ингушетиядан, Дагъыстандан бла Чеченден 270 спортчу къатышхандыла.

Кёп болмай Зеленокумскда  дзюдодан СКФО-ну биринчилиги ётгенди. Анга къатышханланы араларында Деваланы Мансур да бар эди. Таулу жашчыкъ 2011-2012 жыллада туугъан къауумда эрише, 38кг ауурлукъ категорияда алчылыкъны жибермей, Шимал Кавказда кеси жыл санында бек кючлю болгъанын кёргюзтгенди.

Минги тауну этегинде «Элбрус» спорт школ ачылгъанлы быйыл 15 жыл толгъанды. Ол бутийреде тау лыжала бла кюрешгенден тышында дагъыда грек-рим тутушууну бла боксну айнытырча онгла да болгъанына ахшы юлгюдю.

Озгъан ыйыкъда Надым шахарда «Надымгазпром» организацияны биринчи директору В. Стрижовну хурметине тёрели бокс турнир ётгенди.